ТИҚХММИ: QS'нинг минтақавий рейтингида Ўзбекистоннинг тўртта ОТМлари муносиб ўрин эгаллади

Ўзбекистон Республикаси олий таълим тизимини 2030 йилгача ривожлантириш концепциясида “Республикадаги камида 10 та олий таълим муассасасини халқаро эътироф этилган ташкилотлар (Quacquarelli Symonds World University Rankings, Times Нigher Education ёки Academic Ranking of World Universities) рейтингининг биринчи 1000 та ўриндаги олий таълим муассасалари рўйхатига, шу жумладан Ўзбекистон Миллий университети ва Самарқанд давлат университетини биринчи 500 та ўриндаги олий таълим муассасалари рўйхатига киритиш” вазифалари белгиланган. Бу борада Олий ва ўрта махсус таълим вазирлиги ва барча ОТМларда мақсадли режалар бўйича ишлар бошлаб юборилган.

2020 йилнинг 16 декабрь куни Quacquarelli Symonds Ltd (QS) халқаро рейтинг агентлигининг “Ривожланаётган Европа ва Марказий Осиё давлатлари олий таълим муассасаларининг (QS World University Rankings: Emerging Europe and Central Asia)” 2021 йилги рейтинги эълон қилинди.

Ушбу рейтингда Ривожланаётган Европа ва Марказий Осиё давлатларининг энг илғор 400 та университетлар рўйхати эълон қилинди.

Унда Ўзбекистон тарихида биринчи бўлиб рейтингга кирган Тошкент ирригация ва қишлоқ хўжалигини механизациялаш муҳандислари институти 2019 йилдаги 301+ ўриндан 50 поғона юқорилаб,  251+ ўринда қайд этилди. Шунингдек, Мирзо Улуғбек номидаги Ўзбекистон Миллий университети, Самарқанд давлат университети ҳамда Тошкент давлат техника университети “351-400” ўриндан жой олишди. Қувонарлиси QSнинг минтақавий рейтингида  қайд этилган Ўзбекистоннинг ОТМлари сони 4 тага етди. Бу эса ҳозирги кунда “Янгиланаётган Ўзбекистон”нинг олий таълим тизимидаги самарали фаолиятини, таълимга бўлган муносабатни юксалаётганлигидан дарак беради.

Ўзбекистон Олий таълим кенгаши раиси, профессор Ў.Умурзаков “Республикамиздаги ОТМларининг халқаролигини таъминлаш, улардаги ўқув тарзини босқичма-босқич халқаро талабларга мос ўқув методикасига ўтказиш, талабаларга ўзлари танлаган соҳада сифатли таълим бериш фақатгина Концепцияда белгилаб ўтилган университетлардагина эмас балки, ҳар бир ОТМ муассасасида амалга оширилиши керак. ОТМларнинг мақсади рейтинглардан ўрин олишгина эмас, уларда яратилган шарт-шароитлар, ўқув лабораториялари, таълимнинг ишлаб чиқариш билан узвий боғлиқлигини таъминлаш, хорижлик профессор-ўқитувчиларни республика Олий таълим тизимига жалб этиш, улар билан фикр алмашган ҳолда халқаро нуфузни оширишга қаратилиши керак” лигини таъкидлайди. Шунинг учун ҳам барча ОТМлар томонидан ўзларининг олдига баланд мақсад ва режаларни қўйиш, амалга ошириш билан Ўзбекистоннинг Олий таълими имижини оширишга ҳаракат қилиниши мақсадга мувофиқ бўлади.

Шу ўринда, “Ривожланаётган Европа ва Марказий Осиё давлатлари олий таълим муассасаларининг (QS World University Rankings: Emerging Europe and Central Asia) халқаро рейтингидан ўрин эгаллаган республикамизнинг фаол университетлари жамоасини мазкур натижа билан муборакбод этиб, янада юқори натижаларга эришишларини тилаймиз.

ТИҚХММ Институти Матбуот хизмати