АКТ ва информатика йўналишига ихтисослашган мактабларга қабул бошланди

 2020-2021 ўқув йили учун ахборот технологиялари ва информатика фанини чуқурлаштириб ўқитишга ихтисослаштирилган таянч мактабларга илк бор иқтидорли ўқувчиларни қабул қилиш бўйича квоталар тасдиқланди. Бу ҳақда Халқ таълими вазирлиги хабар бермоқда.

Қайд этилишича, айни вақтда барча таянч мактабларда қабул комиссиялари ташкил этилган ва саралаш танловида иштирок этадиган талабгорларнинг ҳужжатлари қабул қилинмоқда. Ҳужжатларни электрон платформа орқали онлайн ҳам топшириш мумкин.

2021 йилнинг январь ойи бошида Халқ таълими вазирлиги, Ахборот технологиялари ва коммуникацияларини ривожлантириш вазирлиги ҳамда Давлат тест маркази билан биргаликда тасдиқланган қабул квоталари асосида республика бўйича ташкил этиладиган 12та ахборот технологиялари ва информатика йўналишидаги таянч мактабларга иқтидорли ўқувчиларни саралаб олиш бўйича танловлар ўтказилади.

Таянч мактабларда таҳсил олиш учун 540 нафар иқтидорли ўқувчи 2021 йилнинг январь ойида Давлат тест маркази томонидан ўтказиладиган саралаш тест синовлари асосида саралаб олинади.

Энг муносиб ҳамда иқтидорли ўқувчилар 2020-2021 йилнинг 2-ярим йиллигидан бошлаб ахборот технологиялари ва информатика йўналишидаги таянч мактабларда таълим олишни бошлайди.

Эслатиб ўтамиз, Тошкент шаҳри ва Фарғона вилоятида мазкур йўналишдаги мактаблар ташкил этилганлиги сабабли уларга ўқувчилар қабули 2020-2021 ўқув йили бошида ўтказилган. Бугунги кунда ушбу мактабларда 120 нафар 5-синф ўқувчилари ахборот технологиялари ва информатика йўналишида таҳсил олмоқда.