Жек Ма икки ойдан буён оммага кўриниш бермади. Аввалроқ Хитой ҳукумати унга уруш эълон қилганди

Financial Times нашрининг маълум қилишича, ноябрда Ма ўзи асос солган, африкалик ёш тадбиркорлар 1,5 миллион долларлик мукофот жамғармасига эга грант учун рақобатлашадиган Africaʼs Business Heroes конкурси финалида иштирок этмаган. Ма конкурс ҳакамлар ҳайъати қаторида бўлиши керак эди, аммо у шоунинг финал қисми съёмкаларига келмаган, уни промороликка қўшишмаган, унинг номи сайтдаги ҳакамлар рўйхатидан ўчирилган. Alibaba компаниясидагилар Ма конкурс финалига тиғиз тақвим туфайли кела олмаганини маълум қилишган.

Taiwan News нашри Манинг ижтимоий тармоқдаги сўнгги ёзуви 17 октябр куни эълон қилинганига эътибор қаратди.

Октябр ойи охирида Шанхайдаги конференцияда Ма халқаро молиявий регуляторлари қоидалари эскирганини айтган ва Хитой банкларини танқид қилиб, улар «ломбардча менталитет»га эгалигини маълум қилганди. Бу Alibaba холдинги таркибига кирувчи ва Хитойдаги энг йирик мобил тўловлар платформасини бошқаришга мўлжалланган Alipay’га эгалик қилувчи Ant Group’нинг биржага чиқишидан бироз олдин содир бўлган. 5 ноябрь куни назорат пакети Мага тегишли бўлган Ant Group Шанхай ва Гонконг биржаларида IPO’ни амалга ошириши керак эди. Бу тарихдаги энг йирик IPO’га айланиб, компания 34,4 миллиард доллар жалб этиши керак бўлган.

Бироқ биржага чиқишдан икки кун олдин Хитой молиявий регуляторлари Ма ва Ant Group раҳбарларини суҳбатга чақирган. Reuters манбасининг сўзларига кўра, улар бизнесларини тўлиқ текширув кутаётгани тўғрисида огоҳлантирилган. Ant Group IPO’си қолдирилган — аввалроқ Хитой ҳукумати компания топ-менежерларига бу борада қаршилик кўрсатмасликка ваъда берган эди. Бундан ташқари, декабрь ойида Хитой регуляторлари Ant Group’ни шаффоф рақобат принципларини ва истеъмолчилар ҳуқуқларини бузишда айблаган. Мага мамлакатни тарк этмаслик маслаҳат берилган.

Ма ОАВдан ғойиб бўлиб қолгани туфайли Хитойдаги WeChat ижтимоий тармоғида бу мавзу кенг муҳокама қилинмоқда, Techcrunch хабарига кўра, айримлар тадбиркор Хитойдан қочиб кетганини айтишмоқда, айримлар эса уни «ғойиб бўлишга мажбурлашгани» ҳақида тахминлар билдиришган. Хитойда фаолият кўрсатувчи, бизнес-консалтинг хизматларига ихтисослашган BDA China компанияси раҳбари Дункан Кларк Reuters мухбири билан суҳбатда Ма Хитой ҳукумати унинг бизнесини текширишга қизиқиб қолиши ортидан «узлатга чекинган».

56 ёшли Жек Ма 1999 йилда Alibaba’га асос солган ва 2019 йилда компания раҳбари лавозимини тарк этган, шу билан бирга, компания ҳаммуассиси сифатида ундаги асосий шахслардан бири бўлиб қолаверган. Ҳозирда 635 миллиард долларлик капиталга эга бу компания Хитойдаги иккинчи энг йирик компания ҳисобланади. Яқин вақтгача Ма мамлакатдаги энг бадавлат шахс ҳисобланарди, аммо сўнгги икки ойда Alibaba акциялари арзонлашиши туфайли унинг бойлиги 11 миллиард долларга камайган — 61,7 миллиард доллардан 50,9 миллиард долларга. Эндиликда, Bloomberg Billionaires Index рейтингига кўра Хитойнинг ичимликлар ишлаб чиқарувчи Nongfu Spring компанияси президенти Чжун Шаньшань мамлакатнинг энг бой одамига айланган - унинг бойлиги 58,7 миллиард долларга баҳоланган, Ма эса рўйхатда тўртинчи ўринга тушиб кетган.