Қирғизистонда президент сайловлари ва референдумнинг дастлабки натижалари эълон қилинди

Охирги маълумотларга кўра, президент сайловларида 3,55 млн сайловчидан 33,13 фоизи, референдумда 33,08 фоизи иштирок этган.

Айни вақтда сайлов комиссиясининг марказий серверига сайлов участкаларидан маълумотлар келиб тушиши давом этмоқда ва рақамлар ҳали якуний эмас.

47 фоиз овозлар ҳисоб-китоб қилингандан кейин сайловларда Садир Жапаров 73,04 фоиз овоз билан етакчилик қилаётгани маълум бўлди. Унинг энг яқин рақобатчиси Адахан Мадумаровда 6 фоиз овоз бор. Сайловларнинг 1-босқичида ғалаба қозониш учун 50 фоиздан кўпроқ овоз тўплаш лозим. 

Шунингдек, референдум бўйича ҳам дастлабки натижалар пайдо бўлди. Бюллетенларнинг 50 фоизи қайта ишлангандан кейин бошқарувнинг президент шаклига 81,4 фоиз сайловчилар овоз бергани маълум бўлган.