Қирғиз-ўзбек чегарасида коррупцияга қарши махсус операцияда ўнлаб ходимлар ушланди

Маълумотларга кўра, соат 19:00 атрофида Қирғизистон Миллий хавфсизлик давлат қўмитасининг (МХДҚ) Боткен вилояти бўйича бошқармаси ходимлари «Альфа» махсус бўлинмаси жангчилари билан биргаликда Чегара хизмати, божхона ва ветеринария хизмати ходимларини ҳибсга олган. Улар коррупцияда гумон қилинмоқда.

Манбаларнинг таъкидлашича, махсус хизмат ходимлари «Қадамжой-автойўл» назорат-ўтказиш пункти ҳудудига кирган вақтда шлагбаум ёнида постда турган аскар уларга қарата ўқ узган. Бундан ташқари, бошқа аскар дастлабки маълумотларга кўра, ҳавога битта огоҳлантирувчи ўқ узган. Қуролнинг қўлланилиш ҳолатлари ва унинг қонунийлиги ҳозир аниқланмоқда.

Манбаларнинг маълум қилишича, тинтув давомида Чегара хизмати ходимлари ёнидан 38,5 минг қирғиз сўми, 5 миллион 484 минг ўзбек сўми, шунингдек, JAC-3202 хизмат автомашинасининг юкхонасидан яна 200 минг ўзбек сўми топилган. Ҳайдовчининг сўзларига кўра, бу пуллар хизмат автомобили ўриндиқлари учун ғилоф сотиб олишга мўлжалланган.

Шунингдек, манбаларга кўра, Божхона хизмати ходимларидан 100 минг қирғиз сўми ва доллардаги пул маблағлари мусодара қилинган. Аниқ сумма аниқланмоқда.

Бундан ташқари, манбаларнинг таъкидлашича, «Чечме-автойўл» назорат-ўтказиш пунктининг икки ходими пул маблағларини ноқонуний олаётганда видеокузатув камераларига тушиб қолган.

Манбаларга кўра, «Чечме-автойўл» назорат-ўтказиш пунктидан 11 нафар ва «Қадамжой-автойўл» назорат-ўтказиш пунктидан 16 нафар ҳарбий хизматчи Миллий хавфсизлик давлат қўмитасининг Боткен вилояти бўйича бошқармасига келтирилган. Улардан иккита АК-74 автомати, иккита ўқдон ва 60 та патрон мусодара қилинган.

Тергов ҳаракатлари давомида ҳар икки назорат-ўтказиш пункти фаолияти вақтинча тўхтатилгани айтилмоқда. Манбаларга кўра, 3 мингга яқин киши ва 400 та автомобил навбатда турган. Кейинроқ «Қадамжой-автойўл» назорат-ўтказиш пункти орқали ҳаракат тикланган.

Махсус операция юзасидан Қирғизистон МХДҚ расмий изоҳ бермаган.