Аудиторлик фаолияти учун лицензия олиш бекор қилинмоқда

Парламент юқори палатасининг ўн иккинчи ялпи мажлисида «Аудиторлик фаолияти тўғрисида»ги қонун кўриб чиқилди ва маъқулланди.

Маълум қилинишича, ҳужжат аудиторлик фаолиятини тартибга солишнинг халқаро меъёрларига асосланади.

Хусусан, қонунда:

• аудиторлик фаолиятининг лицензияланадиган фаолият турлари таркибидан чиқарилиши;
• аудиторлик фаолияти фақат Аудитнинг халқаро стандартлари асосида амалга оширилиши;
• мажбурий аудиторлик текширувидан ўтиши зарур бўлган ижтимоий аҳамиятга эга ташкилотлар рўйхати шакллантирилиши;
• аудиторлик ташкилотларининг устав капитали миқдорига бўлган талаб бекор қилиниши ҳамда улардаги аудиторларнинг энг кам сони камида тўрт нафар бўлиши;
• айнан битта хўжалик юритувчи субъектда аудиторлик текширувини кетма-кет етти йилгача ўтказишга рухсат берилиши белгиланди.

Шунингдек, ҳужжатда «Таваккалчилик-таҳлили» асосида аудиторлик ташкилотлари иши сифатини ташқи назоратдан ўтказиш ва унинг натижаларини ваколатли давлат органи ва аудиторлар республика жамоат бирлашмаларининг расмий веб-сайтида эълон қилиш назарда тутилмоқда.

Маълумот учун, «Аудиторлик фаолияти тўғрисида»ги қонун 1992 йил 9 декабрда қабул қилинган. 2000 йилда унга ўзгартиш ва қўшимчалар киритилиб, янги таҳрири тасдиқланган.

Аввалроқ, аудиторлик фаолиятида қандай ўзгаришлар кутилаётгани хабар қилинган эди.