Россияда коронавирусга қарши учинчи вакцина рўйхатдан ўтказилди

"КовиВак" ҳозирча клиник синовларнинг учинчи босқичидан ўтказилмаган. Синовлар у рўйхатдан ўтказилганидан кейин бошланади.

Фото: Anadolu Agency

Россияда коронавирусга қарши учинчи вакцина рўйхатга олинди.

"Бугун "КовиВак" вакцинаси рўйхатга олинганини қайд этамиз, уни Чумаков номидаги марказ ишлаб чиққан. Март ўрталарида дастлабки 120 минг доза вакцина фуқаролар учун чиқарилади", - деб маълум қилди Россия бош вазири Михаил Мишустин.

Унинг билдиришича, Россия коронавирусга қарши учта вакцинага эга дунёдаги ягона мамлакат бўлди.

Ҳозирда Россияда аҳоли асосан "Спутник V" вакцинаси билан эмланмоқда. Мамлакатда шунингдек, "ЭпиВакКорона" вакцинаси рўйхатдан ўтказилган ва ишлаб чиқарилиши йўлга қўйилган.

10 феврал ҳолатига кўра, Россияда 1,7 млн киши икки доза, 2,2 млн киши эса бир доза вакцина билан эмланган.

Михаил Мишустиннинг маълум қилишича, бугунга қадар 10 млн дозадан ортиқ "Спутник V" ва 80 минг дозага яқин "ЭпиВакКорона" вакцинаси ишлаб чиқарилган.

Тайёрлаган Дилшод Аскаров

#Россия #вакцина

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.