Француз компанияси Тошкентда сув таъминотини ривожлантириш учун 145 миллион евро ажратади

20 феврал куни Инвестициялар ва ташқи савдо вазири Сардор Умрзоқов ва Франциянинг Suez компанияси вице-президенти Эрик Гебали учрашув ўтказди.

Инвестициялар ва ташқи савдо вазирлиги ахборот хизмати маълум қилишича, учрашувда Тошкент ва Самарқанд шаҳарларида сув таъминоти тизимларини модернизация қилиш ва ривожлантириш юзасидан лойиҳаларни амалга ошириш масалалари муҳокама қилинган.

Франция компанияси Тошкент шаҳрининг сув таъминоти тизимини яхшилаш лойиҳасини амалга ошириш учун 145 миллион евро миқдорида маблағ ажратишини маълум қилган.

Бундан ташқари, Франция томони Ўзбекистонда бир қатор ижтимоий йўналтирилган лойиҳаларни амалга оширишда иштирок этиш бўйича режалари ҳақида маълумот берди. Хусусан, улардан бири Қорақалпоғистон Республикаси, Бухоро ва Қашқадарё вилоятларидаги умумтаълим мактабларини ичимлик суви билан таъминлаш лойиҳаси ҳисобланади. Лойиҳа компания томонидан грант асосида ажратилган маблағлар ҳисобига амалга оширилади.

Шунингдек, француз компанияси шаҳар ва қишлоқ жойлардаги аҳоли пунктларининг ичимлик суви таъминоти тизимини комплекс ривожлантириш ва модернизация қилиш дастурини амалга оширишга тайёрлигини билдирган.

Аввалроқ, Вазирлар Маҳкамасининг «Франция тараққиёт агентлиги иштирокида «Шаҳрисабз ва Китоб шаҳарларида канализация тизимларини реконструкция қилиш ва кенгайтириш» лойиҳасини амалга ошириш чора-тадбирлари тўғрисида»ги қарор лойиҳаси эълон қилинганди.