Microsoft раҳбари Россияни АҚШ тарихидаги энг хавфли киберҳужумда айблади

Ҳакерлар Америка давлат органлари сайтига киришда фойдаланган код шу даражада мураккабки, бундай кодни яратиш учун мингдан ортиқ дастурчи ишлаши лозим.

Фото: AFP/Getty Images

Кенг миқёсда суриштирув олиб бораётган Microsoft компанияси АҚШ тарихидаги энг хавфли киберҳужум дейилаётган Sunburst ҳакерлик ҳужумини Россиядан бошқа давлат амалга ошира олмайди деб ҳисобламоқда. Бошқа технология компаниялари ҳам бу фикрга қўшилган. Бу ҳақда Microsoft корпорацияси президенти Брэд Смит АҚШ сенатининг разведка бўйича қўмитасида ўтказилган эшитувларда маълум қилди.

"Биз Россия разведкасига олиб борувчи далилларни аниқладик ва бошқа жойга олиб борадиган далил топмадик", - деди Смит.

Унинг сўзларига кўра, киберҳужум бошланган SolarWinds компанияси тизимларига киришга имкон берган кодни яратиш учун мингдан ортиқ юқори малакали дастурчи иш олиб бориши керак. Бу эса мазкур ҳужумда давлат тузилмалари иштирок этганлигини кўрсатади.

Маълумотларга кўра, ҳакерлар 2020 йил мартда SolarWinds компанияси тизимини бузиб киришган. Компания компьютер тизимларини бошқариш ва хавфсизлигини таъминлашга мўлжалланган дастурий таъминот ишлаб чиқаради. Бунда SolarWinds ҳакерлар учун нишон эмас, балки АҚШ ҳукумат муассасалари компьютерларига зарарли дастур жойлаш учун йўл бўлган.

Ҳакерлар ушбу дастур орқали қарийб 8 ой давомида ўнлаб давлат муассалари компьютерларини кузатиб келган.