«Ҳали тадбиркорлар томонидан йўлларга радар ўрнатилмаган» - ЙҲХББ интернетда тарқалган видеога муносабат билдирди

 Ижтимоий тармоқларда тадбиркор томонидан йўлда радар ўрнатилгани айтилган видео тарқалди. ЙҲХББ бу видеодаги маълумотлар ҳақиқатга тўғри келмаслигини маълум қилди.

ЙҲХББ ахборот хизмати вакили Музифа Султонова Kun.uz  мухбирига маълум қилишича, видеода ёлғон маълумотлар акс этган. Унинг қўшимча қилишича, президент қарори билан 1 мартдан бошлаб тадбиркорларга бундай ҳуқуқ берилгани билан ҳали ушбу тартибни амалиётга татбиқ этишга қаратилган Ҳукуматнинг махсус қарори қабул қилингани йўқ.

«Ҳали ушбу қарор қабул қилинмай туриб, тадбиркорларнинг камера ва радар ўрнатиши ҳақида гап-сўз бўлиши мумкин эмас. Қарор бир нечта ташкилотлар томонидан ишлаб чиқилмоқда. Бу фақат ЙҲХББга боғлиқ ҳужжат эмас. Тегишли ташкилотлар билан биргаликда камера ва радарлар ўрнатиш жойларига аниқлик қиритилмоқда. Ҳаммаси ҳал қилинганидан сўнг, Ҳукумат қарори қабул қилинади ва ушбу жойлар электрон аукционда сотишга чиқарилади. Аукционда ғолиб бўлгандан кейингина тадбиркорлар йўлларга камера ва радарлар ўрнатишга ҳақли бўлади.

Бундан ташқари, йўлларга камера ва радарлар ИИВ ва Автомобил йўллари қўмитаси томонидан белгиланган техник талабларга мувофиқ ўрнатилади. Яъни видеода акс этганидек бу жараённи ўзбошимчалик билан ташкил этишнинг имкони йўқ», дейди Музифа Султонова.

Эслатиб ўтамиз, президент қарорида 2021 йил 1 мартдан тадбиркорларга йўлларга камера ва радарлар ўрнатиш ҳуқуқи берилиши назарда тутилган, бироқ ушбу тартибни белгиловчи Ҳукумат қарори ҳали қабул қилинмади.