Коррупцияда айбланаётган Қирғизистон олий суди раиси жиноий жавобгарликка тортилади

Унга нисбатан "Местний суд" автоматлашган ахборот тизимини ишлаб чиқиш ва жорий этишда коррупцияга йўл қўйганлик тўғрисида айблов эълон қилинган.

Фото: Султан Досалиев

Судьялар кенгаши ҳузуридаги интизом комиссияси Қирғизистон олий суди раиси Гулбара Калиевани жиноий жавобгарликка тортишга рухсат берди. Ушбу қарор мамлакат бош прокуратураси тақдимномасига асосан қабул қилинди.

Калиева коррупцияда айбланмоқда. Унга нисбатан "Местний суд" автоматлашган ахборот тизимини ишлаб чиқиш ва жорий этишда коррупцияга йўл қўйганлик тўғрисида айблов эълон қилинган.

Комиссия шунингдек, Калиевани лавозимидан вақтинча четлатишга розилик билдирган. Энди ушбу қарор президент Садир Жапаровга тақдим этилади, у эса парламентга киритади.

Қайд этилишича, интизом комиссиясининг қарори эълон қилиниши билан кучга киради ва унинг устидан шикоят қабул қилинмайди.

Калиева 2012 йилда Қирғизистон олий суди раиси ўринбосарлигига тайинланган бўлиб, 2018 йилда олий суд раиси лавозимини эгаллаган.