Венесуэлада гиперинфляция фонида қиймати 1 млн боливарлик пуллар муомалага киритилади

Хабарларга кўра, янги пуллар Россияда чоп этилмоқда. Венесуэла қарийб уч йилдан буён оғир ижтимоий-иқтисодий инқирозни бошидан кечирмоқда.

Фото: bcv.org.ve

Венесуэлада гиперинфляция фонида номинал қиймати 200 минг (0,11 доллар), 500 минг (0,27 доллар) ва 1 млн боливар (0,53 доллар) бўлган купюралар муомалага киритилмоқда.

Мамлакат марказий банкининг хабарига кўра, янги қийматдаги пуллар 8 мартдан муомалага киритилади.

Венесуэла қарийб уч йилдан буён оғир ижтимоий-иқтисодий инқирозни бошидан кечирмоқда. 2018 йил якунларига кўра, мамлакатда инфляция 1,7 млн фоизга, 2019 йилда эса 9585 фоизга тенг бўлган.

Мамлакат ҳукумати иқтисодиётни мустаҳкамлаш учун янги валюта – суверен боливарни муомалага киритганди, аммо унинг курси кескин тушиб кетди: ҳозирда 1 АҚШ доллари 1,8 млн боливарни ташкил этмоқда.

Bloomberg 2020 йил февралда Россиянинг "Гознак" компанияси Венесуэла пулларини чоп этиши тўғрисида хабар қилганди. Россия компанияси бу хабарга изоҳ беришни истамаган.