AstraZeneca вакцинаси билан эмлангандан сўнг пайдо бўладиган янги ножўя таъсир ҳақида маълум қилинди

Андерс Тегнеллнинг айтишича, қон кетиши эмлангандан бир-икки ҳафта ўтгач бошланади ва бу ҳозирча Европада 10-15 кишида кузатилган.

Фото: Picture Alliance

Швециянинг бош эпидемиологи Андерс Тегнелл AstraZeneca вакцинаси нафақат тромбоз, балки қон кетишига ҳам сабаб бўлиши мумкинлигини айтди. Бу ҳақда SVT телеканали хабар берди.

Унинг сўзларига кўра, тромбоздан бошқа симптомлар ҳақида бир нечта хабар келиб тушган.

Тегнеллнинг айтишича, қон кетиши эмлангандан бир-икки ҳафта ўтгач бошланади ва бу ҳозирча Европада 10-15 кишида кузатилган.

"Бу ёшлар ўртасида учраган анчагина жиддий ножўя таъсир. Ҳозирча вакцина ва симптомлар орасидаги сабаб-оқибат боғлиқлигини аниқлаш имкони бўлмади", - деди у.

Тегнеллнинг қўшимча қилишича, Швеция эмлашни тўхтатиб туришга мажбур.

Аввалроқ тромблар ҳосил бўлиши тўғрисидаги хабарлардан сўнг Европанинг қатор давлатларида AstraZeneca вакцинаси билан эмлаш тўхтатилганди.