16 март куни АҚШнинг Атланта шаҳри ва унинг яқинидаги округда массаж салонларига ҳужум қилиниши оқибатида камида 8 киши ҳалок бўлди. Ушбу жиноятни содир этишда гумон қилиниб 21 ёшли Роберт Аарон Лонг қўлга олинди, деб хабар берган KIRO телеканали.
Аввалроқ AJC портали ҳужумлар оқибатида 7 киши ҳалок бўлгани, 2 киши яраланганини маълум қилган. Унинг маълумотларига кўра, биринчи ҳужум Чероки округидаги массаж салонида содир этилган. Бу ерда номаълум шахс ўт очиб, воқеа жойидан яширинган. Ҳужум оқибатида 3 киши ҳалок бўлган, 2 киши яраланган. Бир соат ўтар-ўтмас Атланта шимолидаги ёнма-ён жойлашган иккита массаж салонига ҳам худди шундай ҳужум уюштирилган. Бу ҳужумлар оқибатида 4 киши ҳалок бўлган. Полиция бир нечта йўлларни тўсиб қўйган.
Полиция Атлантадаги ва ундан 50 км узоқликда жойлашган Черокидаги ҳужумлар ўртасида боғлиқлик бор-йўқлигини ҳали аниқламаган.
Черокидаги ҳужумда гумон қилиниб 21 ёшли Роберт Аарон Лонг қўлга олинган. У полиция таъқибидан кейин воқеа жойидан машинада бир неча соатлик узоқликда жойлашган Крисп округида ушланган.
Таъкидланишича, ҳужумга учраган массаж салонларида асосан осиёликлар ишлаган.