Трамп қўллаган номзод Колумбия сайловида етакчилик қилмоқда

Дастлабки маълумотларга кўра, овозларнинг деярли барчаси санаб чиқилганидан сўнг де ла Эсприэля 49,65 фоиз овоз тўплаган. Унинг асосий рақиби — ҳокимиятдаги сўл қанотдаги «Тарихий пакт» коалицияси вакили Иван Сепеда эса 48,70 фоиз овоз олган. Икки номзод ўртасидаги фарқ тахминан 246 минг овозни ташкил этмоқда.

Ғолиб номзод 7 август куни расман президентлик лавозимини қабул қилиб олади ва мамлакатни 2022 йилдан буён бошқариб келаётган сўлчи президент Густаво Петронинг ўрнини эгаллайди. Колумбия қонунчилигига мувофиқ, Петро иккинчи муддатга номзодини қўя олмаган.

Сайловолди кампанияси давомида Абелардо де ла Эсприэля хавфсизлик ва иқтисодий ислоҳотларни ўз дастурининг асосий йўналишлари сифатида илгари сурди. У наркотиклар савдоси билан шуғулланувчи қуролли гуруҳларга қарши қатъий кураш олиб бориш, жиноятчиликка қарши ҳарбий кучдан фаол фойдаланиш ҳамда Салвадор тажрибасига ўхшаш йирик қамоқхоналар қуришни ваъда қилди.

Шу билан бирга, у иқтисодиётда давлат тартибга солишини қисқартириш, хусусий сектор учун қулай шароит яратиш ва инвестицияларни жалб қилиш тарафдори сифатида танилган.

Унинг рақиби Иван Сепеда эса ижтимоий тенгсизликни камайтириш, давлат дастурларини кенгайтириш ва кенг кўламли ижтимоий ислоҳотларни амалга ошириш ғоялари билан сайловда қатнашган.

Абелардо де ла Эсприэля сайлов кампанияси давомида АҚШ президенти Доналд Трампнинг очиқ қўллаб-қувватловига эга бўлди. Трамп Truth Social ижтимоий тармоғида унинг ғалабасини олқишлаб, «У катта ҳисобда ғалаба қозонди», деб ёзди.

АҚШ давлат котиби Марко Рубио ҳам де ла Эсприэляни телефон орқали табриклаб, уни «Колумбиянинг сайланган президенти» деб атади. У Вашингтон янги маъмурият билан хавфсизлик соҳасидаги ҳамкорликни кучайтириш, ноқонуний миграцияга қарши курашиш ва иқтисодий алоқаларни ривожлантиришдан манфаатдор эканини билдирди.

Сайлов натижалари Колумбия ва АҚШ муносабатларида янги босқич бошланиши мумкинлиги ҳақидаги тахминларни кучайтирмоқда. Чунки амалдаги президент Густаво Петро билан Доналд Трамп маъмурияти ўртасида муносабатлар анча таранглашган эди.

Хусусан, 2025 йил октябр ойида АҚШ Молия вазирлиги Петро, унинг оила аъзолари ҳамда мамлакат ички ишлар вазирига қарши санкциялар жорий қилган. Вашингтон уларни наркотрафикка қарши етарли чора кўрмаганликда айблаган эди. Бунга жавобан Петро АҚШ сиёсатини кескин танқид қилиб, мамлакатда оммавий намойишлар ўтказишга чақирган.

Таҳлилчилар фикрича, де ла Эсприэлянинг эҳтимолий ғалабаси Колумбия ташқи сиёсатида АҚШ билан яқинлашув ва хавфсизлик масалаларига кўпроқ эътибор қаратилишига олиб келиши мумкин.