Еврокомиссия Европа иттифоқи ичида пандемия вақтида ҳаракатланишни осонлаштирувчи рақамли яшил сертификат жорий қилишни таклиф қилди.
Сертификат одам коронавирусга қарши эмлангани, вирусга манфий тест топширгани ва коронавирусга чалингандан кейин соғайганининг исботи бўлади. Таъкидланишича, бу вакцина олишни истамаётган одамларнинг таҳқирланишидан қочишга имкон беради.
Ҳужжат қоғоз ёки рақамли форматда бепул тақдим этилади. У ҳақиқийлигини исботлаш учун махсус QR-кодга эга бўлади.
Сертификат Европа иттифоқига аъзо барча давлатларда амал қилади ҳамда уни Исландия, Лихтенштейн, Норвегия ва Швейцария фуқаролари ҳам олиши мумкин. Сертификатни нафақат ЕИ фуқаролари, балки уларнинг оила аъзолари фуқаролигидан қатъи назар олиши керак бўлади. У, шунингдек, ЕИда яшовчи фуқаролиги йўқ одамларга ва сайёҳларга берилиши лозим бўлади.
“Рақамли яшил сертификат вақтинчалик чора. У ЖССТ коронавирус билан боғлиқ фавқулодда вазият якунланганини эълон қилиши билан тўхтатилади”, деб айтилган Еврокомиссия хабарида.
