Ҳиндистонда спорт мусобақаси вақтида 1,5 минг одам бўлган трибуна қулаб тушди

Фото: скриншот

Ҳиндистоннинг Суряпет шаҳрида мамлакатда оммалашган Кабадди спорт тури бўйича ёшлар ўртасида миллий чемпионат ўтаётган объектдаги трибуналардан бири қулаб тушди. Воқеа оқибатида 100га яқин киши жабрланган.

Полицияда таъкидланишича, ҳалок бўлганлар ҳақида хабар олинмаган.

Дастлабки маълумотларга кўра, трибунада белгилангандан анча кўпроқ одам - 1,5 минг киши бўлган. Барча жабрланганлар яқин атрофдаги шифохоналарга етказилган.

Таъкидланишича, спорт тадбири 25 мартгача давом этади. У учун ёғоч ва бошқа материаллардан учта трибуна қурилган бўлган. Тахмин қилинишича, воқеага трибуна конструкциясининг мўртлиги сабаб бўлган. Бироқ воқеанинг аниқ сабаби тергов якунлангандан кейин маълум қилинади.