Туркияда Қора денгиз ва Ўрта Ер денгизини боғловчи канал қуриш режаси маъқулланди

Туркиянинг Истанбул шаҳрида Қора денгиз ва Ўрта Ер денгизни боғловчи канал (Kanal Istanbul Project) қуриш режаси маъқулланди. «Иккинчи Босфор» деб таърифланаётган каналнинг узунлиги 45 км.ни ташкил этади.

Туркиянинг атроф-муҳит ва урбанизация вазири Мурод Қурумнинг маълум қилишича, янги канал Босфор бўғозидан 20-30 км ғарбдан ўтади.

«Биз Kanal Istanbul Project лойиҳасини ривожлантириш режасини маъқуллаб, жамоатчилик муҳокамасига олиб чиқдик. Канал қурилиши мамлакат ривожи учун жадал қадам бўлади», деб ёзган вазир Твиттердаги саҳифасида.

Канал қурилиши учун 75 миллиард турк лираси (9,2 миллиард доллар) сарфланиши кутилмоқда. Канал бўйлаб ҳашаматли турар жойлар қуриш режалаштирилган. Аввалроқ ушбу лойиҳани Туркия президенти Ражаб Эрдўған ҳам қўллаб-қувватлаган.

Туркия ҳукумати Сувайш каналининг Ever Given кемаси билан тўсилиб қолишини мисол қилган ҳолда Босфор табиий бўғози Қора денгиз ва Ўрта Ер денгизни боғловчи ягона артерия сифатида қўлланишининг хавфли эканига яна бир бор эътибор қаратди. Ҳар йили бўғоз орқали 40 мингдан кўпроқ кема, жумладан, танкерлар ўтади. Бу орада бўғознинг кемаларни хавфсиз ўтказиш қобилияти йилига 20-25 минг кемага баҳоланади.

«Иккинчи Босфор» лойиҳасига қарши чиқаётганлар ҳам талайгина. Уларнинг таъкидлашича, янги канал 17 миллион кишилик Истанбулни ичимлик суви билан таъминловчи сув омборлари орқали ёки уларнинг ёнидан ўтади ва мегаполиснинг сув таъминоти билан боғлиқ мураккаб вазиятни янада ёмонлаштириши мумкин.

Бундан ташқари, кўплаб сиёсатшунослар янги канал Қора денгизга тўғридан тўғри чиқа олмайдиган давлатлар ҳарбий кемаларининг Босфор ва Дарданелл бўғозларидан ўтишини чекловчи 1936 йилги Монтрё конвенцияси таъсири остидан чиқарилиши мумкинлигидан хавотирда.