Johnson & Johnson Европада ўз вакцинаси билан эмлашни бошламай туришга қарор қилди

АҚШнинг Johnson & Johnson компанияси коронавирусга қарши вакцинасини Европада қўлланишини бошламай туришга қарор қилди. Компания АҚШ мутассади идоралари вакцина билан эмланганларда тромбоз ҳолатлари қайд қилингани сабабли унинг қўлланишини тўхтатишни тавсия қилгандан кейин бундай қарор қабул қилди.

 “Маҳсулотларимиздан фойдаланувчи одамларнинг хавфсизлиги ва саломатлиги биз учун устувор масала ҳисобланади. Шу сабабли вакцинамизнинг Европада татбиқ қилинишини бошламай туришга қарор қилдик”, дейилган компания хабарида. Бир неча кун аввал Европанинг дори воситалари агентлиги (EMA) Европада ушбу вакцина билан эмлашни бошлашдан олдин у билан эмланганларда асоратлар пайдо бўлиши мумкинлиги ҳақидаги маълумотни текширишни бошлаганди.

 Аввалроқ АҚШ озиқ-овқат ва дори воситалари назорати бошқармаси (FDA) тромбоз пайдо бўлиши ҳолатлари сабабли Johnson & Johnson компаниясининг вакцинаси билан эмлашни тўхтатиб туришни тавсия қилганди.

Бошқарма маълумотларига кўра, АҚШда ушбу вакцина билан 6,8 млндан кўпроқ киши эмланган. Эмланганлардан 6 нафарида тромбознинг “кам учровчи ва оғир шакли” қайд қилинган. Уларда бундай асорат эмланганларидан 2 ҳафта ўтиб пайдо бўлган.

Айни вақтда Европада бир нечта, жумладан AstraZeneca, BioNTech / Pfizer, Moderna ва Johnson & Johnson вакциналарини қўллашга рухсат берилган.

Johnson & Johnson вакцинаси аксарият вакциналардан фарқли, эмланувчиларга битта доза киритилишини талаб қилади. Шу сабабли вакцина билан кўпроқ одам эмланиши мумкин. Бундан ташқари, уни ташиш учун ўта паст ҳароратлар талаб этилмайди.