Байден ҳамда Путиннинг «олий даражадаги учрашуви»ни ташкил этиш муҳокама қилинди

АҚШ президентининг хавфсизлик масалалари бўйича ёрдамчиси Жек Салливан ҳамда Россия хавфсизлик кенгаши бош котиби Николай Патрушев ўртасида телефон суҳбати бўлиб ўтди. Бу ҳақда Россия хавфсизлик кенгаши ҳамда Оқ уй сайтида маълумот пайдо бўлди.

Суҳбат АҚШ томонининг ташаббуси билан ташкил этилган. Томонлар Байден ҳамда Путиннинг «олий даражадаги учрашуви» ҳамда ўзаро муносабатларни яхшилаш борасида гаплашган. АҚШ ва Россиянинг хавфсизлик бўйича юқори лавозимли мансабдорлари бўлган Салливан ҳамда Патрушев қатор сиёсий мавзуларни муҳокама қилган. Хусусан, ядро дастурлари ва Корея яриморолидаги ҳолат борасида фикр алмашилган.

Россия Хавфсизлик кенгаши сайтида ёзилишича, Патрушев АҚШнинг Россияга қарши жорий этган янги санкциялари асоссиз эканини таъкидлаган ва шунга қарамай, Россия мулоқотга тайёрлигини айтган. Оқ уй ахборот хизматига кўра, томонлар доимий мулоқотда бўлишга келишиб олган.

Маълумот учун, 15 апрел куни АҚШ Россияга қарши янги санкциялар пакетини эълон қилганди. Унга кўра, киберҳужумлар, «Қрим истилоси» ва бошқа ҳолатлар сабаб Россия иқтисодига жиддий таъсир қилиши айтилаётган санкциялар жорий қилинган. Хусусан, Россия давлат қарзини камайтириш учун муҳим бўлган давлат облигациялар савдосига қўйилган чеклов Россия иқтисодиётига жиддий зарба бўлиши мумкин.

Олдинроқ Жо Байден ABC телеканалига интервью бериб, ҳамкасби Владимир Путинни қотил деб ҳисоблашини айтганди. Бу гапга муносабат билдирган Путин жонли эфирда дебат уюштиришни таклиф қилди. Ўз навбатида Путинга телефон қилган Байден учинчи мамлакатда ўзаро учрашишни таклиф қилди.

АҚШ ва Россия президентлари охирги марта 2018 йил Финландия пойтахти Ҳелсинкида саммит кўринишидаги учрашувларда қатнашганди. Ўшанда кўплаб америкаликлар Дональд Трампни кескин танқид қилганди. Трамп 2016 йилги АҚШ президентлик сайловларига Россиянинг аралашуви бўйича мамлакат разведкаси маълумотини эмас, Путиннинг сўзларини тасдиқлагани учун америкалик сиёсатчилар уни президентликка номуносиб деб атаган.

Рад этилган «титанлар тўқнашуви»: Байден ва Путин дебатга чиқса, ким ютган бўларди?