Ҳиндистонда коронавирус беморлари даволанаётган шифохонада 24 киши ҳалок бўлди

Ҳиндистоннинг Маҳараштра штатида коронавирус беморлари даволанаётган шифохонада цистернадан кислород сизиб чиқиши оқибатида 24 киши ҳалок бўлди.

Фото: NDTV

NDTV телеканалининг хабар беришича, воқеа Нашик шаҳридаги давлат шифохонасида юз берган. У ерда кислород таъминоти ва ўпкани сунъий шамоллатиш қурилмасига уланган 150га яқин бемор бўлган.

Таъкидланишича, ҳалок бўлганлар кислород таъминотининг издан чиқиши оқибатида кислород етишмаслигидан жон беришган.

Маҳаллий ҳокимият вакили Сураж Мандхарнинг маълум қилишича, айни вақтда беморларга кислород берилиши тикланган.

Штатнинг соғлиқни сақлаш вазири Ражеш Топ ҳукумат воқеанинг батафсил терговини ўтказишига ваъда берган.