Бугунги кунда Республика миқёсида COVID-19'га қарши кенг қамровли вакцинация жараёнлари олиб борилмоқда. Фарғона шаҳридаги 5-оилавий поликлиникада ҳам аҳолини эмлаш ишлари давом этмоқда. Kun.uz мухбири мазкур поликлиникада бўлиб, жараён билан танишди.
“Вакцинациянинг биринчи босқичи 1 апрелдан бошланган бўлса, шу кунгача 1 349 нафар аҳоли эмланди. Булардан 1300 таси AstraZeneca туридан, 49 таси Ўзбекистон-Хитой қўшма ишлаб чиқарилган вакцинаси билан эмланди.
Вакцинация бошлангандан буён вазиятни тўғри тушунган ҳолда аҳоли бу жараёнда фаол иштирок этиб келмоқда. 65 ёшдан юқори бўлган аҳоли ўртасида шу кунгача бирорта ножўя ҳолат сезганимиз йўқ. Вакцина олган фуқаролар 3 кун муддат ичида патронаж ҳамшира ва врачлар назорати остида бўлишади.
Шу кунгача биз 65 ёшдан юқори фуқаролар ҳамда тиббиёт ходимларини эмлаган бўлсак, 28 апрелдан бошлаб, барча 18 ёшдан юқори бўлган аҳоли ва диспансер назоратида бўлганларни ҳам эмлаш бошланди.” - дейди Kun.uz мухбири билан суҳбатда Фарғона шаҳридаги 5-оилавий поликлиника бош шифокори Ферузахон Мадалиева.
