Путин ва Байден учрашуви Женевада ўтказилиши мумкин – ОАВ

АҚШ ва Россия президентлари Жо Байден ва Владимир Путин ўртасидаги учрашув Женевада бўлиб ўтиши мумкин. Бу ҳақда ўз манбаларига таяниб NBC телеканали хабар берди.

"Женева, Швейцария Байден ва Путин ўртасидаги учрашув ўтказилиши мумкин бўлган жой ҳисобланади, деди АҚШ президенти маъмуриятидаги тўрт манба", - дейилади NBC мухбири Жефф Беннеттнинг твиттер саҳифасида.

Май ойи бошларида Байден Путин билан июн ўрталарида Европада учрашиши мумкинлигини айтганди.

Ўтган ҳафтада Россия ОАВ икки давлат президенти Швейцарияда учрашишини ёзганди.

Россия ташқи ишлар вазири Сергей Лавров Москва бундай миш-мишларга изоҳ бермаслигини айтди.

АҚШ давлат котиби Энтони Блинкен ўтган ҳафтада Путин ва Байден ўртасидаги учрашув яқин ҳафталарда ўтказилишини айтди.