Байден Путин билан учрашувида Минскда журналистнинг ҳибсга олинишини муҳокама қилади

Байден, шунингдек, Путин билан Украина масаласида ҳам фикр алмашади. Бу ҳақда Оқ уй расмий вакили Жен Псаки маълум қилди, дея хабар бермоқда Reuters.

Эслатиб ўтамиз, 23 май куни Греция пойтахти Афинадан Литва пойтахти Вилнюсга қараб йўлга чиққан Ryanair авиакомпанияси самолёти Беларус ҳудудини тарк этиши арафасида ортга қайтарилиб, қирувчи самолёт ҳамроҳлигида Минскка мажбурий қўндирилди.

Қўнишдан сўнг самолёт бортида бўлган беларуслик мухолифатчи фаол Роман Протасевич ва унинг севгилиси, Россия фуқароси бўлган София Сапега ҳибсга олинди. Протасевич – ўтган йили Беларусдаги президентлик сайловларидан кейинги намойишларни ёритиб борган NEXTA Telegram-каналининг собиқ бош муҳаррири саналади.

Расмий Минск, аввалига, самолётда гўёки бомба ўрнатилгани ҳақида Ғазо секторидаги ҲАМАС гуруҳидан хабар олганини билдирди, ҲАМАС буни рад этди. Кейинроқ эса Беларус президенти Александр Лукашенко самолётда гўёки террорчи бўлгани ҳақида гапирди, бу ҳақда Швейцариядан маълумот келганини айтди, бироқ Швейцария авиация маъмурлари ҳам буни рад этди.

Жо Байден ва Владимир Путин учрашуви 16 июнь куни Женевада бўлиб ўтади.

Россия президенти ҳозирча бу воқеага муносабат билдирмади. АҚШ етакчиси эса ҳодисанинг эртасига Беларуснинг хатти-ҳаракатларини қоралаб, баёнот эълон қилган ва журналистни дарҳол озод қилишни талаб қилган. Байден буни «халқаро ҳуқуқнинг оёқости қилиниши» ва «сўз эркинлигига беҳаёларча қилинган ҳужум» деб атаган.