Австралияда йирик жиноий синдикат фаолиятига чек қўйилди

Австралия полицияси жиноий синдикатни ташкил этишда гумон қилиб 200дан кўпроқ кишини ҳибсга олди. Улардан 46 нафарига айблов билдирилган. Полиция ўтказган махсус амалиётда 500 кг гиёҳванд модда, 10 млн доллар нақд пул ва катта миқдорда ҳашамат буюмлари, жумладан, қимматбаҳо автомобиллар мусодара қилинган.

Амалиёт давомида полиция Виктория штатида 70дан ва бутун Австралия бўйлаб 300дан кўпроқ тинтув ўтказган. Шунингдек, яна 18та давлат, жумладан, АҚШ, Британия, Германия ва Янги Зеландияда ҳам ҳибсга олишлар амалга оширилган. 

Маълумотларга кўра, жиноий синдикат бутун Австралия бўйлаб ҳаракат қилган, гиёҳванд модда ҳамда ўқотар қурол ва ўқ-дори савдоси, буюртма қотилликларни амалга ошириш билан шуғулланган. Австралия бош вазири Скотт Моррисон амалиёт давомида «уюшган жиноятчиликка жиддий зарба берилганини» айтган. «Бу нафақат Австралиядаги жиноятчиликка зарба ҳисобланади, у бутун дунёдаги уюшган жиноятчиликка ўз таъсирини кўрсатади. Бу Австралия ҳуқуқ-тартибот идоралари тарихидаги бурилиш онидир», деб айтган Моррисон.

Полицияда маълум қилинишича, Ironsight деб номланган амалиёт 2018 йилда полиция ходимлари синдикат иштирокчиларининг бир нечта хабарларини қўлга киритиб, уни расшифровка қила олгандан кейин бошланган. Шундан кейин австралиялик криминалистлар 3 йил давомида синдикат ва унинг шерикларининг 22 млндан кўпроқ хабарини расшифровка қилиб, таҳлил қилишига тўғри келган. 2018 йилдан бери давом этаётган амалиётда 3,7 тонна гиёҳванд модда, 104та қурол ва 45 млн Австралия долларидан (34,8 млн доллар) кўпроқ нақд пулни мусодара қилишга, 224 кишини ҳибсга олишга муваффақ бўлинган.

Таъкидланишича, тергов доирасида Австралиянинг Виктория штати ва бошқа ҳудудларида тинтувлар ўтказиш ва синдикатга алоқадорларни ҳибсга олиш давом этади.