АҚШ конгрессменлари Ироқда уруш бошлашга рухсат берган резолюция бекор қилинишини қўллаб-қувватлашди

Bloomberg ахборот агентлигининг хабар беришича, резолюциянинг бекор қилиниши ҳақидаги қонун лойиҳаси муаллифи Демократик партия вакили Барбара Ли ҳисобланади. Лойиҳани 268 конгрессмен қўллаб-қувватлаган, 161 нафари қарши чиққан.

Аввалроқ демократларнинг сенатдаги етакчиси Чак Шумер 2002 йилги резолюция Ироқдаги уруш 10 йил аввал якунлангани сабабли ҳозирда керак эмаслигини айтган. У янги ҳужжат президентга «ҳарбий ҳаракатларнинг амалга оширилишини оқлашга» имкон бермаслигини айтган. Шумер собиқ президент Дональд Трамп томонидан 2020 йилда эронлик генерал Қосим Сулаймонийни йўқ қилишга берилган буйруқни бунга мисол тариқасида келтирган. Ўшанда Трамп ўз қарорини қабул қилишда айнан 2002 йилги резолюцияга таянган.

«Биз тарихни қайта кўриб чиқа олмаймиз. Бироқ бу рухсат қонунларда сақланиб қолмоқда ва конгресс уни бекор қилмагани учун у суиистеъмол қилиниши мумкин. Бизнинг адоғи йўқ урушларга чек қўйиш вақти келди. Биз конгресснинг уруш ва тинчлик масалаларидаги ваколатларини тасдиқлаш учун бу имкониятдан фойдаланишимиз лозим», деб айтган Ли вакиллар палатасидаги нутқида.

Шу билан бирга, конгрессменларнинг бир қисми АҚШда 2001 йил 11 сентябрдаги ҳужумлардан кейин террорчиликка қарши кураш бўйича қабул қилинган 2001 йилги резолюция ва Ироқда куч қўллашга рухсат берувчи 1991 йилги резолюцияни ҳам бекор қилиш керак деб ҳисобламоқдалар.

2002 йил 16 октябрда АҚШ конгресси Ироқда ҳарбий амалиётни бошлашга имкон берган резолюцияни қабул қилган эди. Шундан кейин Ироққа АҚШ-Британия коалицияси кучлари томонидан биринчи ракета-бомба зарбалари 2003 йил 20 мартда берилган. Ироқдаги уруш 9 йил давом этган ва 2011 йил 15 декабрда расман якунланган. Бу вақт давомида Ироқда коалициянинг 5 минг ҳарбийси, жумладан, АҚШнинг 4,5 минг аскар ва зобити ҳалок бўлган. Ироқ армияси ва полициясининг йўқотишлари 10–15 минг кишини, тинч аҳоли орасидаги қурбонлар эса турли маълумотларга кўра, 60 мингдан 150 минггача кишини ташкил қилган.