ЖССТ Евро-2020 сабабли Европада коронавируснинг янги тўлқини юз бериши муқаррарлигини айтди

Унинг таъкидлашича, Европада касаллик даражаси пасайиши тугади ва мухлисларга нисбатан етарлича чекловлар киритилмаса, коронавируснинг янги тўлқини юз бериши муқаррар. 

«Биз нафақат стадиондаги шароитларга қарашимиз керак. Биз мухлислар у ерларга қандай етиб олаётгани, лиқ тўла автобусларда бораётгани, стадионларни қандай тарк этаётгани, тўлиб-тошган бар ва пабларга бораётганига ҳам эътибор қилишимиз лозим», деб айтган Смоллвуд.

Айни вақтда Европанинг 11та шаҳрида футбол бўйича Европа чемпионати бўлиб ўтмоқда. Чемпионатнинг аксарият учрашувлари трибуналарнинг 20 фоиздан кўпроғи тўлган ҳолда ўтказиляпти.  

Бироқ Будапештдаги 61 минг кишига мўлжалланган «Пушкаш Арена» стадионида мухлисларнинг учрашувларга қўйилишига ҳеч қандай чеклов йўқ. Лондондаги «Уэмбли» стадионида ўтадиган яримфинал ва финал учрашувларига эса 60 мингдан кўпроқ мухлис қўйилади. Бу стадион сиғимдорлигининг учдан икки қисмидан кўпроғини ташкил қилади.

Мутахассислар Европада коронавируснинг ўта юқумли «ҳиндча» штамми тарқалаётганидан хавотирланмоқда. Вируснинг ушбу штамми ҳозирда 98та давлатда тарқалган.

Ҳозирда Британияда умумий касалланиш ҳолатларининг 90 фоиздан ортиғи айнан «ҳиндча» штаммга тўғри келяпти. Ушбу штаммдан АҚШ, Европа мамлакатлари, Россия ва бошқа кўплаб давлатлар ҳам азият чекмоқда.

Аввалроқ Германия канцлери Ангела Меркель Европа чемпионати учрашувлари мухлислар билан тўла ҳолда «Уэмбли» стадионида ўтказилиши ғоясини салбий баҳолаганди. Унинг фикрича, бу «ҳиндча» штаммнинг Европада тарқалишини жадаллаштириб юбориши мумкин. Германия ички ишлар вазири Хорст Зеехофер эса УЕФАнинг трибуналарга кўп сонда мухлисларни қўйиш қарорини танқид қилиб, буни масъулиятсизлик деб атаганди.