Фото: AP Photo/Bruno Thevenin
2021 йил биринчи ярмида Европага денгиз орқали етиб олишга уриниш вақтида 1,2 минг қочқин ҳалок бўлди. Бу 2020 йил биринчи ярмидаги кўрсаткичга нисбатан 2 марта кўпроқни ташкил қилади. Ўшанда 513 қочқин ҳалок бўлган.
Халқаро миграция ташкилоти маълумотларига кўра, жинси ва ёшини аниқлашга муваффақ бўлинган қурбонлар орасида 50 бола, 409 эркак ва 104 аёл бўлган. Европага етиб олишга уринганлар учун «энг қирғинбарот» йўл Ўрта Ер денгизининг Ливия ва Италия ўртасидаги қисми бўлган. Бу йўналишда 741 киши ҳалок бўлган. Атлантика океанининг Ғарбий Африка ва Канар ороллари ўртасидаги қисмида эса 250 қочқин ҳаётдан кўз юмган.
