Тўқаев Қозоғистонда аҳоли коронавирусга қарши мажбуран эмланмаслигини айтди

«Вакцина олишни истамаганлар билан ишлашда дифференциал ёндашув лозим. Рад этиш сабаблари турлича. Ундайлар орасида иккиланаётганлар ҳам кўп», — деди Қозоғистон президенти.

Фото: akorda.kz

Қозоғистон ҳукумати аҳолини йирик меҳнат жамоалари билан боғлиқ ҳолатлардан ташқари, коронавирусга қарши эмланишга мажбур қилмайди. Бу ҳақда мамлакат президенти Қосим-Жўмарт Тўқаев айтди.

«Вакцина олишни истамаганлар билан ишлашда дифференциал ёндашув лозим. Рад этиш сабаблари турлича. Ундайлар орасида иккиланаётганлар ҳам кўп», — деди у.

Унинг сўзларига кўра, уларни барча воситалар орқали ишонтириш керак.

«Ғарбнинг айрим ривожланган мамлакатларида ишонтириш услубидан мажбурлаш чораларига ўтишмоқда. Биз бундай қилмаймиз, йирик меҳнат жамоалари фаолияти билан боғлиқ ҳолатлардан ташқари», — деди Тўқаев.