Қозоғистон қуролли кучлари юқори даражадаги жанговар шайлик ҳолатига келтирилади

Мамлакатдаги ҳарбий қисмлар ва ўқув полигонларида 29 июндан 2 июлгача машғулотлар ўтказилади.

Фото: Қозоғистон мудофаа вазирлиги

Қозоғистонда қўшинларни юқори даражадаги жанговар шайлик ҳолатига келтириш бўйича машғулотлар ўтказилади. Бу ҳақда мамлакат мудофаа вазирлиги хабар берди.

Аниқлик киритилишича, машғулотлар 29 июндан 2 июлгача бўлиб ўтади.

«Ўтказиладиган тадбирлар режали ўқув тусига эга ҳамда ҳарбий қисмлар ва ўқув полигонлари ҳудудида бўлиб ўтади», — дейилади хабарда.

Вазирликнинг билдиришича, айрим йўллар вақтинчалик ёпилиши мумкин.

Мудофаа вазирлиги ижтимоий тармоқлар фойдаланувчилари ва ОАВ вакилларини фақат расмий манбаларда эълон қилинган маълумотларга таянишга чақирган.