Тожикистон ва Россия меҳнат мигрантларига пенсия бериш бўйича лойиҳа тўғрисида келишиб олди

Россиядаги тожикистонлик меҳнат мигрантларини пенсия билан таъминлаш масалаларини мувофиқлаштириш бўйича келишув лойиҳасининг барча жиҳатлари борасида келишиб олинди, деб маълум қилди Тожикистон ижтимоий суғурта ва пенсия агентлиги директори Дилмурод Давлатзода.

"Россия ва Тожикистон ўртасида пенсия таъминоти соҳасида ҳамкорлик қилиш тўғрисидаги келишув лойиҳасининг баҳсли жойлари бартараф қилинди. Лойиҳа кўриб чиқиш учун ҳукуматга тақдим этилди", — деди Давлатзода.

Унинг сўзларига кўра, Тожикистон ижтимоий суғурта ва пенсия агентлиги пенсия таъминоти соҳасидаги ҳамкорликни ривожлантириш мақсадида Қирғизистон ва Ўзбекистон билан ҳам музокаралар олиб бормоқда.

Душанбе билан тегишли келишув имзоланмаган мамлакатларда ишлайдиган Тожикистон фуқаролари пенсия ёшига етганидан сўнг ижтимоий нафақа олади, деди Давлатзода.