Полша разведкаси: Россия маблағига намойишлар ташкил этган гуруҳ фош этилди

Полша Ички хавфсизлик агентлиги (ABW) маълум қилишича, депортация қилинган шахслар Варшава, Вроцлав, Краков, Закопане ва Бидгошч шаҳарларида ўтказилган махсус операциялар давомида қўлга олинган.

Тергов маълумотларига кўра, гумонланувчилар 2025 йил кузидан бошлаб Полшада истиқомат қилаётган украиналик қочқинлар орасида турли акция ва намойишларда иштирок этиш учун одамларни жалб қилган ҳамда уларга ҳақ тўлаган. Махсус хизмат иддаосича, бу фаолиятни молиялаштириш учун маблағлар Россиядан келиб тушган.

ABW таъкидлашича, ушбу ҳаракатларнинг асосий мақсади Полшадаги украиналик қочқинлар жамоасига босқичма-босқич таъсир ўтказиш ва улардан сиёсий шиорларни илгари суриш воситаси сифатида фойдаланиш бўлган.

Махсус хизмат маълумотига кўра, ташкилотчилар Украинадаги коррупция можаролари ва мамлакат ички сиёсатига оид баҳсли мавзулар каби кучли ҳиссий таъсир уйғотадиган масалалардан фойдаланишга уринган.

Полша расмийлари аввал ҳам Россиянинг мамлакатдаги норозилик ҳаракатларига аралашишга уринаётгани ҳақида баёнотлар берган. Хусусан, 2024 йил феврал ойида Полша Ташқи ишлар вазирлиги фермерлар намойишларида пайдо бўлган антиукраин шиорлари ортида Россия махсус хизматлари таъсиридаги гуруҳлар бўлиши мумкинлигини билдирган эди.

Бундан ташқари, 2023 йил май ойида Михаил Ходорковский билан боғлиқ «Досье» тадқиқот маркази Россия ҳокимияти Европа Иттифоқи давлатларида кенг кўламли дезинформация кампанияларини ташкил этгани ҳақида маълум қилган. Унда НАТО иттифоқчилари ўртасида келишмовчилик келтириб чиқариш ва европаликларда украиналикларга нисбатан салбий муносабатни шакллантиришга уринишлар қайд этилган.

Полша махсус хизмати ҳозирча мазкур иш бўйича қўшимча тергов ҳаракатлари давом этаётганини маълум қилди.