АҚШдан келтирилган «Moderna» вакцинаси республиканинг барча ҳудудларига тақсимланади

Санитария-эпидемиологик осойишталик ва жамоат саломатлиги хизмати бошлиғи ўринбосари Ботир Қурбоновнинг маълум қилишича, келтирилган 3 млн 60 минг доза «Moderna» вакцинаси ўзбекистонликларни эмлаш учун бутун мамлакат бўйлаб тарқатилади.

«Ушбу вакцина совуқлик занжирига риоя қилган ҳолда республиканинг барча ҳудудларига аҳоли сонидан келиб чиққан ҳолда тақсимланади. Вакцина тез кунларда керакли жойларга етказиб берилади ва эмлаш жараёнларида фойдаланиш бошланади.

«Moderna» ЖССТ фавқулодда ҳолатларда фойдаланиш учун рухсат берган 6 вакцинанинг бири ҳисобланади. Булар: «Pfizer», «Moderna», «AstraZeneca», «Johnson & Johnson», «Sinopharm», «CoviShield» вакциналари ҳисобланади», дейди Қурбонов.

Ўзбекистонда ҳозирга қадар ишлатилган вакциналар рекомбинант вакциналар бўлиб, «Moderna» коронавирусга қарши ишлаб чиқарилган илк РНК оқсилига асосланган вакцинадир. Қурбоновнинг айтишича, йил якунига қадар аҳолининг кўпроқ қатламини вакцина билан қамраб олиш учун 660 минг доза «AstraZeneca», 1,2 млн доза «Pfizer», 1 миллион дозадан ортиқ «Спутник V» келтирилиши режалаштирилган.