Токио-2020. Хитой яққол пешқадам, россиялик спортчилар атрофида навбатдаги можаро, Жокович яна олтин ололмайдиган бўлди

Токио олимпиадасида навбатдаги кун ўйинлари ҳам якунланди. 30 июл кунги баҳслардан кейин Хитой медаллар жамғармасида етакчилик қиляпти. Чинликлар ҳисобида 19 та олтин 10 та кумуш ва 11 та бронза бор. Мезбон Япония 17 та олтин билан иккинчи, 31 июл тонгдан яна иккита олтин олган АҚШ 16 та чемпионлик билан учинчи бўлиб турибди. 30 июл кунги баҳсларда сузиш мусобақалари Австралияга ҳам яна бир олтин келтирди. Натижада австралияликлар олтинлар сони бўйича русларга етиб олишди.

Рилов икки карра чемпион. Яна рус спортчилар атрофида можаро

30 июл кунги баҳсларда АҚШ бирорта олтин олмаган ва кунни атиги учта медал билан якунлаганди. Кечаги тонг россиялик спортчилар учун омадли кечди. Чалқанча услубда 100 метрга сузишда чемпион бўлган Евгений Рилов 200 метрда ҳам энг яхши эканини кўрсатди. Шунингдек, ўқ отишда Виталина Бацарашкина ҳам олтин олди. Рилов чалқанча сузишда анча йиллардан буён рейтинг етакчиси эди ва шу сабаб унинг ғалабасини мантиқий деб қараш мумкин. Бироқ бу услубда 100 метрга сузишда жаҳон ва олимпиада рекордчиси ҳисобланган америкалик Райан Мёрфи тақдирлаш маросимидан кейин ғалати гапларни айтди. У гўёки «тоза бўлмаган» рақибга қарши курашганини иддао қилди. Буни россиялик спортчининг допинг истеъмол қилганига ишора деб тушунилди. Аммо спортчилар инстаграмда ўзаро ёзишишди ва Мёрфи гаплари хато таржима қилинганини айтди. Икки юлдуз ҳам келишиб олишди.

Шу тариқа Евгений Рилов икки карра олимпиада чемпионига айланди. У 200 метрга чалқанча сузишда олимпиада рекордини ўрнатгани ҳам муҳим. Виталина Бацарашкинага ҳам икки карра чемпион деган ном насиб этди. У ўйинларда Россиянинг биринчи ва ҳозирча охирги олтинини ўқ отиш баҳсларида қўлга киритган. Спортчининг айтишича, Токиога келишдан аввал шоҳсупага чиқишини тасаввур ҳам қилмаган.

Британия ҳам ҳозирга келиб иккита жиддий мусобақада енггач, аҳволини яхшилаб олди. Триатлон ва бешкурашда британияликлар иккита олтинни қўлга киритишди. Мутахассислар бундай баҳслардаги ғалабаларни бир нечта олтинга тенг дейишади. Чунки спортчилар бир қанча спорт турларида қатнашишга мажбур бўлишади. Шунингдек, эркаклар ўртасидаги сузиш эстафетасида ҳам олтин британияликларга насиб этди.

Жокович яна олтин ололмайдиган бўлди

Жаҳон тенниси қироли бўлиб турган сербиялик Новак Жокович учинчи уринишда ҳам олимпиада чемпиони номини қўлга кирита олмайдиган бўлди. У 2008 йил Пекинда бронза олганди. Кейинчалик Лондонда Жокович мезбон Маррейга яримфиналда енгилгач, 3-ўрин учун ўйинга чиқмайди ва Хуан-Мартин дел Потро осонгина бронза медалига эга чиқади. 2016 йил эса аргентиналик теннисчи Жоковични биринчи босқичдаёқ тушириб юборади. Ниҳоят жаҳон теннисида тенгсиз бўлиб турган 2021 йилда унга омад келади деб кутишганди, лекин Токиода ҳам Новак олтин ютолмайдиган бўлди.

Яккалик баҳсларида германиялик Александр Зверев сербни яримфиналда мағлуб этди. Энди у яккаликда бронза учун курашади. Микс жуфтликда ҳам Жокович яримфиналда имкониятни бой берди. У россиялик амалдаги олимпиада чемпиони Елене Веснина бошчилигидаги жуфтликка мағлуб бўлди. Энди миксда ҳам Жокович бронза учун курашади.

Енгил атлетикада ҳам баҳслар, медаллар ўйналиши бошланди. 10 минг метрга югуришда ким ғолиб бўлди деб ўйлайсиз? Табиийки Эфиопия жамоаси аъзоси. Кейинги ўринларда угандалик спортчилар қайд этилишди. Эшкак эшишда доимги жамоалар олтин медалларни қўлга киритишяпти: Янги Зеландия, Чехия, Канада. Велоспортда эса нидерландияликлар ғалаба қозонишда давом этишяпти.

Қуйида 30 июл куни ўйналган барча медаллар билан танишишингиз мумкин:

Тўппончадан отиш. Аёллар. 25 метр

1. Виталина Бацарашкина (Россия);

2. Ким Мин Жон (Жанубий Корея);

3. Сяо Цзяжуйсюань (Хитой).

Сузиш. 200 метрга чалқанча сузиш. Эркаклар

1. Евгений Рилов (Россия);

2. Райан Мёрфи (АҚШ);

3. Люк Гринбанк (Буюк Британия).

Камондан ўқ отиш. Аёллар

1. Ан Сан (Жанубий Корея);

2. Елена Осипова (Россия);

3. Лючилла Боари (Италия).

Академик эшкак эшиш. Аёллар, яккалик

1. Эмма Твигг (Янги Зеландия);

2. Анна Пракатень (Россия);

3. Магдалена Лобниг (Австрия).

Дзюдо. Эркаклар. +100кг

1. Лукаш Крпалек (Чехия);

2. Гурам Тушишвили (Грузия);

3. Тамерлан Башаев (Россия);

3. Тедди Ринер (Франция).

Қиличбозлик. Эркаклар. Жамоавий шпага

1. Япония;

2. Россия;

3. Жанубий Корея

Сузиш. Аёллар, 200 метрга брасс

1. Татьяна Шонмакер (ЖАР);

2. Лилли Кинг (АҚШ);

3. Энни Лэзор (АҚШ).

Аёллар, 100 метрга эркин сузиш

1. Эмма Маккеон (Австралия);

2. Шивон Хоуи (Ҳонконг);

3. Кейт Кэмпбелл (Австралия).

Эркаклар, 200 метрга комплекс сузиш

1. Шунь Ван (Хитой);

2. Данкан Скотт (Буюк Британия);

3. Жереми Депланш (Швейцария).

Академик эшкак эшиш. Эркаклар, яккалик

1. Стефанос Дускос (Греция);

2. Кьетиль Борш (Норвегия);

3. Дамир Мартин (Хорватия).

Аёллар, саккизлик

1. Канада;

2. Янги Зеландия;

3. Хитой.

Эркаклар, саккизлик

1. Янги Зеландия;

2. Германия;

3. Буюк Британия.

Велоспорт. Эркаклар

1. Ник Кимманн (Нидерландия);

2. Ке Уайт (Буюк Британия);

3. Карлос Йепес (Колумбия).

Аёллар

1. Бетани Шривер (Буюк Британия);

2. Мариана Пахон (Колумбия);

3. Мерел Смюлдерс (Нидерландия).

Батутда сакраш. Аёллар

1. Жу Сюэин (Хитой);

2. Лю Линлин (Хитой);

3. Бруни Пейжд (Буюк Британия).

Бадминтон. Аралаш жуфтлик

1. Хуан Дунпин – Ван Илюй (Хитой);

2. Чжэн Сивэй – Хуан Яцион (Хитой);

3. Юта Ватанабе – Ариса Хигасино (Япония).

Слалом. Эркаклар. Байдаркада яккалик

1. Иржи Прскавец (Чехия) – 91,63;

2. Якуб Григар (Словакия) – 94,85;

3. Ханнес Айгнер (Германия) – 97,11.

Дзюдо. Аёллар. +78 кг

1. Акира Соне (Япония);

2. Идалис Ортис (Куба);

3. Ирина Киндзерская (Озарбойжон);

3. Романа Дико (Франция).

Енгил атлетика. Эркаклар. 10 минг метрга югуриш

1. Селемон Барега (Эфиопия) – 27.43,22;

2. Жошуа Чептегеи (Уганда) – 27.43,63;

3. Жейкоб Киплимо (Уганда) – 27.43,88.

Стол тенниси. Эркаклар

1. Ма Лун (Хитой);

2. Фань Чжэньдун (Хитой);

3. Дмитрий Овчаров (Германия).

Еттинчи кунги баҳсларни ҳам ўзбекистонлик спортчилар медалсиз якунлашди. Айни вақтда Ўзбекистон делегацияси бир олтин ва бир бронза олган ҳолда умумий рейтингда Эстония ва Ирландия билан 31-33-ўринларни бўлишиб турибди.