АҚШ охирги 40 йилдаги энг йирик ҳарбий-денгиз машғулотларини бошлади

Машғулотларга 36та жанговар кема, жумладан, авиаташувчилар, ракета крейсерлари, эсминецлар, сувости кемалари, денгиз авиацияси, денгиз пиёда қўшинлари жалб этилган.

Фото: Flickr

АҚШ LSE 2021 (Large Scale Exercise 2021) глобал интеграциялашган ҳарбий-денгиз машғулотларини бошлади, деб хабар берди АҚШ ҳарбий-денгиз кучлари.

Америка ҳарбийларининг маълумот беришича, 16 августгача давом этадиган LSE 2021 машғулотлари “душман кучларига глобал қаршилик кўрсатиш сценарийларига асосланган”.

Қайд этилишича, LSE 2021 совуқ уруш давридан буён ўтказилаётган энг йирик ҳарбий-денгиз машғулотлари ҳисобланади. Сўнгги марта бундай кўламдаги машғулотлари 1981 йилда ўтказилган.

Ҳарбий-денгиз машғулотларига 36 та жанговар кема, жумладан, авиаташувчилар, ракета крейсерлари, эсминецлар, сувости кемалари, денгиз авиацияси, денгиз пиёда қўшинлари жалб этилган. Машғулотларда 25 мингдан ортиқ ҳарбий хизматчи иштирок этади.