Токио кундалиги. Ўзбекистон яна бир медал олди, юнон-рум курашчилари якунлади, боксчилардан ягона вакил қолди

Токио Олимпиадасининг 11-кунидаги баҳсларда олти нафар ўзбекистонлик спортчи иштирок этди. Кун якунларига кўра, фақат бир спортчи олтин медал олди, қолганлар турнирдаги иштирокини муваффақиятсиз якунлади.

Кунни енгил атлетика бўйича баҳслар бошлаб берди.

Уч хатлаб сакраш мусобақасида иштирок этган Руслан Қурбонов саралаш баҳсларида уч уринишда ҳам сакрай олмади ва мусобақани ҳеч қандай натижасиз якунлади.

Ўзбекистон бокс жамоаси эса турнирда катта муваффақиятсизликка учрамоқда. Бугунги баҳслардан кейин 11 нафар спортчидан фақат бир нафари турнирда қолмоқда.

3 август куни ўзбекистонлик уч боксчи чоракфиналда рингга чиқди. Дастлаб Рио Олимпиадаси чемпиони Шаҳобиддин Зоиров (-52 кг) филиппинлик Карло Паламга қарши жанг қилди. Дастлабки раунд филиппинлик боксчининг ҳисобига ёзилди. Иккинчи раунд давомида рефери Зоировнинг қоши ёрилгани учун жангни тўхтатди. Шу вақтга қадар тўпланган очколар ҳисобига кўра филиппинлик боксчи ғолиб деб топилди. Энди у яримфиналда мезбонлар вакили Косэй Танакага қарши рингга чиқади.

Элнур Абдураимов (-63 кг) арманистонлик Ховханнес Бачков қаршисида ожиз қолди - ҳакамлар бир овоздан унинг рақиби ғалабасини қайд этишди.

Райҳона Қодирова (-60 кг) эса бразилиялик Беатриз Феррейрага ютқазиб, медалдан қуруқ қолди.

Эндиликда Ўзбекистон бокс жамоасида медал учун курашадиган биргина вакил қолди. Баҳодир Жалолов 4 август куни яримфиналда британиялик Фрейзер Кларкка қарши жанг қилади.

Маълумот учун, Ўзбекистон бокс терма жамоаси беш йил муқаддам, Рио Олимпиадасида 3та олтин, 2та кумуш ва 2та бронза билан умумжамоа ҳисобида биринчи ўринни қўлга киритганди.

Юнон-рум кураши жамоасининг сўнгги вакили Рустам Ассакалов (-87 кг) иштирокини яхши бошлади. У 1/8 финалда грузиялик жаҳон чемпиони Лаша Гобадзега қарши кураш олиб борди. Унда Ўзбекистон вакили 6:5 ҳисобида ғалаба қозонди.

Аммо чоракфиналда ўзбекистонлик курашчи хорватиялик Иван Хуклекка мағлуб бўлди - 1:4. Хуклек эса яримфиналда украиналик Жан Беленюкка қарши гиламга чиқиб имкониятни бой бериб қўйди. Натижада Рустам Ассакаловда бронза учун курашиш имконияти бўлмади.

Шу тариқа, юнон-рум кураши жамоаси Олимпиадани медалсиз тарк этадиган бўлди. Бунгача Элмурат Тасмурадов (-60 кг), Мўминжон Абдуллаев (-130 кг) ва Жалғасбай Бердимуратов (-77 кг) муваффақиятсизликка учраганди. Тасмурадов ва Бердимуратов илк босқичдаёқ, Абдуллаев эса чоракфиналда курашни тўхтатган, уларнинг рақиблари финалга чиқа олмаган ва бронза учун курашиш имконияти бўлмаганди.

Ўзбекистон делегацияси қарийб бир ҳафтага чўзилган медалсиз танаффусдан кейин олтин медал олди. Оғир атлетикачи Акбар Жўраев икки йўналишда Олимпиада рекордини ўрнатган ҳолда чемпион бўлди. У даст кўтаришда 193 кг, силтаб кўтаришда 237 кг натижа кўрсатди (Олимпия рекорди), жами 430 кг.ни (бу ҳам Олимпия рекорди сифатида қайд этилди) ўзига бўйсундирди.

Маълумот учун, ҳозирда 21 ёшда бўлган Акбар Жўраев 2019 йил сентябрида Таиланддаги ёшлар ўртасидаги жаҳон чемпионатида силтаб кўтаришда 229 кг натижа, жами 417 кг натижа кўрсатиб, жаҳон рекордларини ўрнатганди. 2021 йил апрелида Тошкентда ўтказилган Осиё чемпионатида эса силтаб кўтаришда 234 кг натижа билан Осиё рекордини янгилаганди.

Оғир атлетика жамоасининг -67 кг вазн тоифасидаги вакили Адҳамжон Эргашев жами 312 кг (139+173 кг) тош кўтарган ва мусобақани олтинчи ўринда якунлаганди. -55 кг вазн тоифаси вакили Муаттар Набиева даст кўтаришда Олимпиада рекордини қайд этган бўлса-да, якунда тўртинчи ўринда қолиб кетган (98+114), -76 кг вазн тоифаси вакили Кумушхон Файзуллаева эса олтинчи ўринни (101+126) эгаллаганди.

Жўраевнинг олтинидан кейин Ўзбекистон умумий рейтингда 46-ўриндан 27-ўринга кўтарилди.