Акбар Жўраев жаҳон рекордини ўрнатди

Жўраев 3 та олтин, Руслан Нуриддинов эса 2 та бронза медални қўлга киритди.

Ўзбекистонлик оғир атлетикачи Акбар Жўраев Норвегиянинг Форде шаҳридаги оғир атлетика бўйича жаҳон чемпионатида учта олтин медал олди, шу билан бирга, уч карра жаҳон чемпионига айланди.

110 килограммгача бўлган вазн тоифасидаги беллашувларда қатнашган спортчи барча йўналишларда олтин медалларни қўлга киритди. Хусусан, у даст кўтариш машқида 196 кг натижа билан жаҳон рекордини ўрнатди.

Силтаб кўтаришда эса 232 кг натижа билан ҳам тенгсиз бўлди, ҳар икки йўналишда ва 428 кг кўрсаткич умумий йўналишда биринчи бўлиб, жами 3 та олтин медалга эга чиқди. Бу унинг учинчи марта жаҳон чемпиони бўлишидир. Бунгача у 2021 йил Тошкентда ва 2023 йил Ар-Риёдда ўтказилган турнирларда ҳам ғолиб чиққанди.

Қайд этиш керакки, у силтаб кўтаришнинг учинчи уринишида 245 килограммга буюртма берганди, аммо штангани кўтара олмади. Агар бу амалга ошганида барча йўналишларда жаҳон рекордчисига айланган бўларди.

Худди шу вазнда шитирок этган Руслан Нуриддинов эса даст кўтаришда 186 кг билан тўртинчи, силтаб кўтаришда эса 228 кг билан учинчи бўлди. Натижада Нуриддинов силтаб кўтариш ва умумий ҳисоб бўйича 2 та бронза медалига сазовор бўлди.