Россияда меҳнат мигрантлари бармоқ изларини топшириши мажбурий қилинади

Россияда меҳнат мигрантлари дактилоскопиядан ўтиши, яъни бармоқ изларини топшириши мажбурий қилинади. Россия ички ишлар вазирлигида маълум қилинишича, 29 декабрдан кучга кирадиган ушбу қоида Россияга 90 кундан кўпроққа келадиганлар учун тааллуқли бўлади.

Фото: Коммерсантъ

“2021 йил 29 декабрда Россияга 90 кундан кўпроққа иш излаб келган хорижий фуқаролар ва бошқа тоифадаги хорижликлар мажбурий дактилоскопиядан ўтишини кўзда тутувчи федерал қонун кучга киради”, деб айтилган вазирликда.

Ушбу қонун билан хорижликлар учун рус тили, Россия тарихи ва қонунчилиги асослари бўйича имтиҳон талабларига амал қилиши ортидан давлат назорати ўрнатилиши ҳамда хорижликларга имтиҳондан ўтганлик ҳақида тегишли сертификат берилиши кўзда тутилган. Бундан ташқари, хорижликлар учун электрон ахборот ташувчига эга ягона ҳужжат киритиш режалаштирилган. Унинг татбиқ этилиши хорижликларнинг 100 фоиз идентификациясини таъминлашга имкон беради.

1 июлда Россия президенти Владимир Путин Россияга 3 ойдан кўпроқ муддатга келувчи хорижликлар учун мажбурий биометрик рўйхатдан ва тиббий кўрикдан ўтиш ҳақидаги қонунни имзолаганди. Ушбу ҳужжат дактилоскопиядан ўтиш, суратга тушиш ва тиббий кўрикдан ўтиш мажбуриятини қўяди. Қонунга кўра, Россияга ишлагани келувчи хорижликлар 30 кун ичида тиббий кўрикдан ўтишлари лозим.