“Фақат аёл бўлганим учун номзод қилиб кўрсатилмадим” — Мақсуда Ворисова бўлажак сайловдаги иштироки ҳақида

ХДП пленумида партия марказий кенгаши раиси ўринбосари, Қонунчилик палатасининг Фуқароларнинг соғлиғини сақлаш масалалари қўмита раисининг ўринбосари Мақсуда Ворисова президентлик сайловида партия номидан иштирок этиши маълум қилинди. Тадбир якунида Мақсуда Ворисова билан кичик интервью ташкил этилди.

— Президентлик сайловида нимани орзу қиляпсиз?

— Бир мен эмас, кўп минг сонли Халқ демократик партияси сайловда ғалаба қозонишни ва ўзининг дастурий вазифаларини амалга оширишни ўз олдига нафақат орзу, балки мақсад қилиб қўйган.

— Ўзбекистон бошқарувининг аёл кишига топширилишига, халқ сизга ишонишига кўзингиз етяптими?

— Бу шахсга нисбатан бўлган ишонч эмас, бу партиянинг ғоялари, мақсадлари ва дастуримизга бўлган ишонч. Халқ биздан бугун уни қийнаб турган муаммоларини тизимли ҳал қилишимизни кутяпти. Биз ишсизлик, уй-жой муаммоси, коммунал хизматлар ва асосий озиқ-овқат турлари нархларининг назоратсиз ошиб кетиши каби муаммоларнинг олдини олмоқчимиз.

Агар мана шу мақсадларимизни халқимизга тўғри етказиб бера олсак, халқимиз албатта бизни қўллаб-қувватлайди.

— Кўпчилик Улуғбек Иноятов номзоди кўрсатилишини кутганди. Президентликка сизнинг номзодингиз кўрсатилишида гендер тенглиги омили ҳисобга олинди, деб ўйлайсизми?

— Халқ демократик партиясида гендер тенглигига доимо эътибор берилган. Мен фақат аёл бўлганим учун номзод қилиб кўрсатилмадим. Менинг фикримча, халқ орасидан чиққан оддий бир она, оддий бир аёл бўлганим, халқимизни қийнаб турган муаммоларни ич-ичидан билганим сабабли ҳам мени танлашди, деб ўйлайман.