«Шомуродовни танимай бўладими» – Сречко Катанец Ўзбекистонга келди ва аэропортдаёқ интервью берди

Ўзбекистон миллий жамоаси янги бош мураббийи Сречко Катанец Ўзбекистонга етиб келди. Истанбул – Тошкент йўналиши билан учган словениялик мураббий соат 01:30 да Ислом Каримов номидаги халқаро аэропортга етиб келди.

Аэропортдан чиқишда мураббийни ОАВ вакиллари, миллий жамоа фан-клуби, ЎФА раҳбарияти ва мухлислар кутиб олди. Мураббий аэропортнинг ўзида ОАВ вакилларига қисқача интервью беришга улгурди.

«Жаҳон чемпионатига чиқа оламизми? Унгача қиладиган ишлар кўп, кунлар, ойлар ишлагач, нимадир дейиш мумкин. Жаҳон чемпионати жуда юқори натижа. Асосийси, сизда яхши футболчилар бор.

Шомуродовни танийманми? Уни танимай бўладими, у ҳақда тез-тез ўқиб тураман. «Рома»дек топ жамоада ўйнаши миллий жамоа ва шахсан мен учун ҳам яхши, албатта. Умид қиламан, Шомуродов Моуриньонинг жамоасида кўпроқ вақт ўйин амалиётига эга бўлади.

Бошқа футболчиларни ҳам эътибордан четга қолдирмаслик керак. Мен Ўзбекистон миллий жамоасини биламан, бу ерда яхши футболчилар бор.

Ҳужумкор ўйин кўрсатаманми? Менимча, натижа кўрсатадиган ўйин қилиш керак. Мана, Италия Европа чемпионатида натижа учун ўйнаб, чемпион бўлди. Барчангизга раҳмат, ҳали кўп гаплашамиз деб ўйлайман», деб Катанецнинг сўзларини келтирмоқда Kun.uz мухбири.

Маълумот учун, 58 ёшли Катанецнинг охирги иш жойи Ироқ миллий жамоаси бўлган. У 2018 йил Ироқ билан Купер бошчилигидаги Ўзбекистонни Тошкентдаги ўртоқлик ўйинида мағлуб этган эди.

Катанец мураббийлик фаолияти давомида Словения, БАА ва Македония миллий жамоасини ҳам бошқарган. Айнан унинг мураббийлигида Словения миллий жамоаси 2000 йил илк марта Европа чемпионатига, 2002 йил илк марта жаҳон чемпионатига чиққан.