Johnson & Johnson бош директори йил охирида истеъфога чиқади

Johnson & Johnson компанияси бош директори Алекс Горски истеъфога чиқишини эълон қилди. 2022 йил январдан унинг ўрнини компаниянинг ижроия қўмитаси раҳбари ўринбосари, компанияда 32 йилдан бери фаолият юритиб келаётган Хоакин Дуато эгаллайди.

Фото: Reuters

Май ойида 61 ёшга тўлган Горски келгусида ижрочилик вазифаларига эга директорлар кенгаши раҳбари лавозимини эгаллайди.

Горски Johnson & Johnson’га 9 йил раҳбарлик қилган. У бош директор лавозимидан кетиши ҳақидаги баёнотида эндиликда эътиборини оилавий ишларга қаратмоқчилигини маълум қилган.

Компания Горскининг раҳбарлиги вақтида ишлаб чиқарадиган маҳсулотлари турини кўпайтирган ва ўз молиявий ҳолатини мустаҳкамлаган. Ҳозирда компания дори-дармондан тортиб контакт линзалар ва гигиена воситаларигача бўлган турли-туман маҳсулотларни ишлаб чиқаради.

Компаниянинг 2021 йил 2-чорагидаги савдолари ҳажми 27 фоизга ошиб, 23,3 млрд долларга етган. Унинг капиталлашуви ҳозирда 470 млрд доллардан кўпроқни ташкил қилмоқда.

Шу билан бирга, Горски раҳбарлиги вақтига компанияга қарши бир нечта узоқ давом этган тортишувлар тўғри келган. Шу йил июль охирида компания “опиод эпидемияси” иши бўйича 5 млрд доллар компенсация тўлашга рози бўлган.