Башар Асад эълон қилинмаган ташриф билан Москвага келди

Сурия президенти Башар Асад эълон қилинмаган ташриф билан Москвага келди ва россиялик ҳамкасби Владимир Путин билан учрашув ўтказди. Путин учрашув чоғида Асадни Сурия президенти сайловларидаги ғалаба билан табриклаган ва унинг мамлакатни тиклашдаги саъй-ҳаракатларини юқори баҳолаган.

Фото: kremlin.ru

“Бизнинг биргаликдаги саъй-ҳаракатларимиз билан Суриянинг асосий, катта ҳудуди озод қилинди. Террорчиларга жиддий талафот етказилди ва Сурия ҳукумати сиз бошчилигингизда ўз ҳудудининг 90 фоизини назорат қилмоқда”, деб юзланган Россия президенти суриялик ҳамкасбига.

Путиннинг фикрича, Суриядаги бош муаммо у ерда БМТ ва Суриянинг рухсатисиз хорижий давлатлар қуролли кучлари қолаётгани ҳисобланади. Россия раҳбари “Сурияда ҳамон террорчилар томонидан қаршилик кўрсатиш ўчоқлари қолаётгани, бироқ шунга қарамай озод қилинган ҳудудларга қочқинлар фаол қайтаётганини” қайд қилиб ўтган.

Ўз навбатида, Башар Асад Сурияда ўтказилган сиёсий жараёнлар “3 йилдан бери тўхтаб қолганини” айтган. “Сурияда сиёсий жараёнларни ўтказишга ҳар томонлама қаршилик қилаётган муайян давлатлар мавжуд. Бошқа омиллар ҳам бор, бироқ биз уларни англаймиз ва долзарб масалаларни ҳал қилиш учун имкони бор ишни қилмоқдамиз”, деб айтган Асад. У Москвага кўрсатилаётган инсонпарварлик ёрдами ва Суриядаги вазият бўйича позицияси учун миннатдорлик билдирган.

Сурияни 2000 йилдан бери бошқариб келаётган Башар Асад мамлакатда 26 майда ўтган охирги президент сайловларида ҳам 95,1 фоиз овоз билан ғалаба қозонди.