Соғлиқни сақлаш вазирлиги Ўзбекистонга «Синовак» вакцинаси ҳам олиб келинишини маълум қилди. Бунга Ўзбекистон ва Туркия ҳукуматлари ўртасида соғлиқни сақлаш соҳасида грант ёрдамига оид имзоланган битим асос бўлди.
«Туркия Ўзбекистонга COVID-19га қарши 200 минг доза Хитойда ишлаб чиқарилувчи «Синовак» вакцинаси, шунингдек, 20 минг қути «Фавипиравир» дори препаратларини дўстлик ва хайрихоҳлик белгиси сифатида юборади», дейилади хабарда.
«Дунё» ахборот агентлиги хабарига кўра, битимни Ўзбекистон Республикаси номидан Туркиядаги элчи Алишер Аъзамхўжаев, иккинчи томондан эса соғлиқни сақлаш вазири ўринбосари Халил Элдемир имзолади.
Ўзбекистонда ҳозирда 5та турдаги:
- AstraZeneca,
- ZF-UZ-VAC2001,
- Sputnik V,
- Moderna,
- Pfizer/BioNTech вакциналаридан фойдаланилмоқда.
Шу пайтгача мамлакатда эмлаш жараёнларида 22 433 729 доза вакцина қўлланган бўлиб, 5,1 миллиондан ортиқ киши вирусга қарши тўлиқ эмланди.
Маълумот учун, Sinovac ЖССТ томонидан фавқулодда вазиятларда фойдаланиш учун тасдиқланган еттинчи вакцина бўлган эди. Препарат инфекциянинг симптоматик кечишидан 51 фоизга, COVID-19нинг оғир шаклидан 100 фоиз ва касалхонага ётқизилишдан 100 фоизга ҳимоя қилиши аниқланган.
