АҚШда Трамп сиёсатидан жабр кўрган мигрантларга 1 миллиард доллар тўланиши мумкин

АҚШнинг амалдаги президенти Жо Байден маъмурияти АҚШ чегарасини кесиб ўтиш вақтида ўз оила аъзоларидан айрилган мигрантларга товон пули таклиф қилмоқчи. Бу ҳақда The Wall Street Journal (WSJ) нашри хабар берди. Қочқинлар оилаларини бўлиш сиёсати Дональд Трамп президентлиги вақтида амал қилган.

WSJ маълумотларига кўра, ҳар бир мигрантга 450 минг долларгача компенсация таклиф этилади. Умумий сумма 1 млрд доллардан ошиши мумкин. Оқ уй маъмурияти бу қарорга мигрантлар шикоятларидан кейин келган. Улар АҚШ ҳукумати сиёсати сабабли руҳий жароҳат олганларидан шикоят қилишган. Айни вақтда судга 940 га яқин мигрантлар оилалари мурожаат қилган. 

Иммиграция сиёсати Дональд Трампнинг 2016 йилдаги сайловолди кампаниясининг асосий мавзуларидан бири бўлган. У бу борада киритган сиёсатдан кўплаб америкаликлар норозилигидан кейин 2018 йил баҳорида воз кечишга тўғри келган. Бироқ Трамп янги президентлик муддатида ушбу сиёсатни қайтармоқчи бўлган. Шунингдек, унинг президентлиги вақтида грин-карталарни бериш қоидалари ҳам қатъийлаштирилганди.