Швеция бош вазири бир йил ичида иккинчи марта истеъфога чиқишини эълон қилди

Швеция бош вазири Стефан Левен парламент спикери Андреас Норлен билан учрашувда истеъфога чиқишга ариза топширди. Эътиборлиси, Левен жорий йилда иккинчи марта ўз истеъфосини эълон қилмоқда.

Фото: AP

У янги бош вазир сайланмагунга қадар вақтинчалик ҳукуматга раҳбарлик қилади.

Левен матбуот анжуманида бош вазир лавозимида ўтказган 7 йилидан фахрланишини айтган. У ҳукуматни 2014 йилдан бери бошқариб келган. У жорий августда 2022 йил сентябрда ўтадиган умумий сайловларгача истеъфога кетишини айтган.

Амалдаги молия вазири Магдалена Андерссон Швециянинг янги бош вазири бўлиши мумкин. У октябрда ҳукмрон Социал-демократик ишчи партиянинг янги етакчиси этиб сайланган.

Левен жорий ёзда Швеция тарихида фаолиятига ишончсизлик билдирилган биринчи бош вазирга айланганди. Бу парламентда турар жой бинолари ижара ҳақи бўйича юзага келган зиддият сабабли юз берган.

Бироқ мухолифат лаёқатли коалицияни шакллантира олмагач, Левен ўз истеъфосини эълон қилгандан 2 ҳафта ўтиб яна ўз лавозимига қайтган.