Наманганда эркак ўзи билан ишқий муносабатда бўлган аёлнинг Malibu-2 машинасини ёқиб юборди

Наманган шаҳар Давлатобод туманида эркак ўзи билан ишқий муносабатда бўлган аёлнинг Malibu-2 машинасини ёқиб юборган. Бу ҳақда вилоят ИИБ хабар бермоқда.

Маълум қилинишича, 2021 йил 13 ноябр куни соат 4:00 ларда Наманган вилояти ИИБ 102 хизматига Наманган шахар Давлатобод туманида яшовчи 1989 йилда туғилган аёлга тегишли Malibu машинаси яшаш уйи олдига қўйган вақтида ёниб кетгани ҳақида хабар келиб тушган.

Ҳолат юзасидан олиб борилган тезкор суруштирувда аниқланишича, аёл билан 2021 йил мартдан буён ишқий муносабатда бўлиб келган Наманган шаҳрида яшовчи фуқаро ўртасида келишмовчилик келиб чиққан.

2021 йил 13 ноябр куни соат 03:00 ларда фуқаро маст ҳолда аёлга тегишли Malibu’нинг ойнасини тош билан синдириб, ўзи билан олиб келган 10 литр бензинни машина салонини ичига сепиб ёқиб юборган. Оқибатда машина ёниб кетган ва яроқсиз ҳолга келган.

Қайд этилишича, ҳозирда мазкур холат юзасидан Давлатобод тумани ИИБ ҳузуридаги тергов бўлими томонидан терговга қадар текширув харакатлари олиб борилмоқда.

2020 йилнинг 18 июнь куни Тошкент тумани Файзобод МФЙ ҳудудида жойлашган фермер хўжалиги майдони яқинида 1994 йил туғилган аёл киши ўзганинг мулкини қасддан нобуд қилиш мақсадида МЧЖ балансидаги 2019 йилда ишлаб чиқарилган қора рангли Malibu-2 русумли автомобилни ёқиб юборганди.