Россияда коронавирус: ўлим яна максимал кўрсаткичда, ҳар бир эмланган одам учун тиббиёт ходимларини рағбатлантиришмоқчи

Ҳукумат вакиллари эмланганлар сонини ошириш бўйича чоралар кўришда давом этмоқда. Айрим минтақаларда фуқароларнинг бир неча тоифалари учун мажбурий эмланиш жорий этиляпти.

Ҳудудлар бирин-кетин Касалликни бошдан кечирганлик, эмланганлик ёки вакцина олмаслик ҳақида тиббий маълумотнома тўғрисида QR-кодга эга бўлмаганларга савдо марказлари, меҳмонхона ва ресторанларга бориш бўйича тақиқлар жорий этяпти. Масалан, Краснодар ўлкасида август ойидан бери вакцинанинг ҳеч бўлмаганда битта дозасини олган ёки сўнгги олти ой ичида касал бўлганларгина меҳмонхоналарга жойлашиши мумкин эди. Ноябрь ойида эса ушбу талаблар савдо марказлари ва ресторанларга борадиганлар учун ҳам амал қила бошлади.

2021 йилнинг ноябрь ойида Сочи тоғ кластеридаги янги йил учун буюртмаларнинг қарийб 30 фоизи QR-код қоидалари билан боғлиқ чеклов чоралари туфайли йўқотилди, деди “Қизил Поляна” курортини стратегик ривожлантириш директори Ольга Филипенкова.

Расмийлар томонидан касалланиш кўрсаткичи пасайгани айтилаётганига қарамай, Россия бир неча кундирки, Covid-19 сабабли юзага келган ўлим ҳолатларининг суткалик энг юқори кўрсаткичини янгилаяпти. Сўнгги бир кунда 1 247 киши вафот этган. Жами 36 626 касалланиш ҳолатлари аниқланган, 36 388 киши тузалган.

Коронавирусга қарши курашиш тезкор штаби ўзининг кунлик ҳисоботларида «Росстат»га қараганда камроқ ўлим ҳолатларини қайд этади. «Росстат» кўпроқ маълумот тўплайди ва одатда мамлакатда барча вафот этганлар тўғрисидаги маълумотларни умумлаштириб, ўлим ҳолатларини икки марта кўпроқ ҳисобга олади.

Соғлиқни сақлаш вазирлиги эмлашда иштирок этган тиббиёт ходимларига пул тўламоқчи

Россия Соғлиқни сақлаш вазирлигида эмлашда иштирок этган тиббиёт ходимларини рағбатлантириш таклиф этилди. Ҳуқуқий ҳужжатлар лойиҳалари порталида эълон қилинган ҳукумат қарори лойиҳасига тушунтириш хатида ана шу ҳақда ёзилган.

Идора тўловни ҳар бир эмланган киши учун 200 рубль миқдорида белгилашни таклиф қилмоқда. Матнда келтирилишича, биринчи босқичда эмланаётган кишини консультация қилган шифокор 60 рубль, вакцина олишдан аввал ва кейин кўрикдан ўтказган шифокор эса 40 рубль олади. Укол қилган ходим ҳар бир эмланган одам учун 30 рублдан олади. Бемор иккинчи уколни олишга келганида уни кўздан кечирган шифокор 40 рубль, укол қилган ходим эса 30 рубль олади. Агар вакцина битта дозали бўлса, фуқаро билан консультация ўтказган ва уни эмлашга йўналтирган шифокор 90 рубль олади, вакцинадан аввал ва кейин беморни кўрикдан ўтказган шифокор 60 рубль, укол қилган ходим 50 рубль олади.

“Вакцина олишни юқори суръатларда ушлаб туриш, шунингдек, тиббиёт ходимлари фуқаролар ўртасида тушунтириш ишлари олиб боришларини қўллаб-қувватлаш чораси сифатида аҳолини эмлашда иштирок этувчи ходимларни моддий рағбатлантириш таклиф этилмоқда”, — дейилади норматив ҳуқуқий ҳужжатлар лойиҳалари расмий порталида эълон қилинган тушунтириш хатида.

Июль ойида «Медуза» нашри Белгород областидаги феномен ҳақида ёзганди. Бу минтақада мажбурий эмланиш жорий этилмаган бўлса ҳам у мамлакатда вакцина суръатлари бўйича биринчи ўринни эгаллади. Нашрнинг ёзишича, вакцина олиш муваффақиятли кечишида “расмийлар маълум қилишни истамаган” шифокорларни пул билан рағбатлантириш асосий омил бўлган.

“Ана шу чора жорий этилгач, областда вакцина олиш суръати шу даражада ўсдики, ҳатто вакцина етказиб беришда ҳам узилишлар кузатилди”, — деб ёзди «Медуза». Нашр танишиб чиққан ҳужжатдан шу маълум бўлдики, шифокорларга тўловлар кунлик режа бажарилишига боғлиқ бўлган.

Вакцина олиш юқори даражада бўлганига қарамай, Белгород областида бошқа минтақаларда бўлгани каби куз фаслида касалланиш ҳолатлари кескин ортди. Минтақа вакцина олганларнинг касалхонага жойлаштирилиш кўрсаткичи бўйича мамлакатда иккинчи ўринни эгаллади. Эмланганларнинг 12 фоизи касалхонага ётқизилди. Энг юқори кўрсаткич Москва областида бўлган. У ерда эмланганларнинг 18 фоизи касалхонага тушган.

Россияда профилактика чоралари 2024 йилгача узайтирилди

«Роспотребнадзор» Россияда коронавируснинг олдини олиш учун санитария-эпидемиология қоидалари амал қилиш муддатини 2024 йилгача узайтирди. Қарор 17 ноябрь куни кучга кирди.

Бундан ташқари, қарор бўйича сўнгги олти ой ичида коронавирус билан касалланган ёки вакцина олган одам бемор билан контактда бўлса, унда касаллик белгилари кузатилмаса, ўз-ўзини изоляция қилмаслигига рухсат берилади.

2024 йилгача узайтириш техник узайтириш бўлди, уни бекор қилиш мумкин, бироқ ҳозирча пандемиянинг охири кўринмаяпти, деди президент матбуот котиби Дмитрий Песков журналистларга. “Дастлаб биз пандемия ярим йил, бир йилдан кейин тугайди деб ўйлагандик. Ҳозир эса ҳисоб-китобларда адашганимизни кўряпмиз. Пандемия тугаса, бекор қилиниши мумкин”, — деди у.

Мутахассислар пандемия тугаши борасида турли муддатлар ҳақида гапиришади. Жаҳон соғлиқни сақлаш ташкилоти (ЖССТ)нинг Россиядаги вакили Мелита Вуйнович “жамиятда вирусга йўл бермайдиган, етарли даражадаги иммунитетга эришилгач” пандемия тугашини маълум қилди.

Авваллари мутахассислар бунинг учун эмланганлар 60 фоизни ташкил қилиши керак, деб ҳисоблашарди. Бироқ айрим мамлакатлар ана шу кўрсаткич остонасига етганида бу фоиз етарли эмаслиги аён бўлди. Ҳозирда мутахассислар пандемия тугаши учун аҳолининг 90 фоизи, жумладан, болаларни ҳам эмлаш кераклиги ҳақида гапиришяпти.

АҚШ бош инфекционисти Энтони Фаучи пандемия 2022 йилнинг баҳор ойида тугашига умид бор деб ҳисоблайди. Moderna компанияси раҳбари эса у 2022 йилнинг сентябрида тугашини башорат қилади.

Женева университети касалхонаси юқумли касалликлар профилактикаси ва назорати хизмати раҳбари Дидье Питтенинг прогнози анча пессимистик руҳда. У беш ёки ўн йилдан кейин жами аҳолида антитана ҳосил бўлгач, коронавирус “тумов каби бўлиб қолади”, дея маълум қилди.

ЖССТ Европа бўлими раҳбари Ҳанс Клюгенинг фикрига кўра, айрим мамлакатларда вакцина олишнинг секинлашуви, шунингдек, профилактика чоралари кучсизланиши пандемия якунланишига тўсқинлик қилаётган асосий омиллардан.

Кексалар учун мажбурий вакцина

Красноярск ўлкасида 60 ёшдан катталар ва ҳуқуқни ҳимоя қилиш органлари ходимлари учун мажбурий вакцина жорий этилди, дея маълум қилди Роспотребнадзор минтақавий бошқарма раҳбари Дмитрий Горяев.

2022 йилнинг 15 январига келиб, ана шу категорияда эмланганлар камида 80 фоизни ташкил этиши керак, дейилади у томонидан эълон қилинган ҳужжатда. Ҳозирда таълим, транспорт, умумий овқатланиш ва савдо соҳаси ходимлари учун мажбурий эмланиш жорий этилган. Кўп функционал марказ, уй-жой коммунал хўжалиги, театр ва гўзаллик салонлари ишчилари ҳам эмланишлари керак.

Аввалроқ бундай чора Кемерово областида жорий қилинганди. У ерда 25 декабрга қадар 60 ёшдан катта кишиларнинг камида 80 фоизи вакцина олиши керак. Вакцинанинг биринчи дозасини эса 25 ноябргача олиш зарур.

Тува Республикасида ҳам 65 ёшдан катталар учун мажбурий эмланиш жорий этилган.

Москва, Костромск, Тверь, Смоленск, Иркутск, Оренбург областлари, Ставрополь ўлкаси ва Сахалин ҳамда кўплаб бошқа ҳудудларда давлат хизматчилари учун мажбурий эмланиш жорий этилган.

Исроил расмийлари Москвада россияликларнинг кириш шартларини муҳокама қилади

Исроил соғлиқни сақлаш ва туризм вазирликлари вакиллари 17 ноябрь куни икки мамлакат ўртасида сайёҳлар алмашинувини қайта тиклаш бўйича музокаралар олиб бориш учун Москвага келди. 15 ноябрдан бошлаб Исроил “Спутник” вакцинасини расман тан олди, у билан эмланган сайёҳлар 1 декабрдан бошлаб мамлакатга кириши мумкин.

Исроил ва Россия вакиллари учрашувида “Спутник” вакцинасини олган россияликларни қабул қилиш механизмини ишлаб чиқиш режалаштирилган.

Вакцина олган сайёҳлар агар сўнгги 14 кун ичида “қизил” мамлакатга бормаган бўлса, Исроилга кириши мумкин. “Спутник V” вакцинасини олганлар ПЦР тест натижасини олгунга қадар карантинда бўлишлари керак.