Россиянинг яна саккизта олий ўқув юрти Ўзбекистонда ўз филиалини очиш ниятида. Бу ҳақда сешанба куни Россия ректорлар иттифоқи президенти, Москва давлат университети ректори Виктор Садовничий маълум қилди.
«Айни дамда Россиянинг яна саккизта олий ўқув юрти Ўзбекистонда филиалини очишни режалаштирмоқда», — деди Садовничий 16 ноябрь куни Россия-Ўзбекистон иккинчи таълим форуми очилишида.
Унинг сўзларига кўра, учта филиалнинг очилиши тегишли ҳужжатларни имзолашнинг якуний босқичида ва «яқин келажакда улар ўзбекистонлик талабалар учун ўз эшикларини очади».
Ўзбекистон томонининг маълумотларига кўра, Ўзбекистон Россия олий таълим муассасаларининг мамлакатдаги филиаллари сони бўйича дунёда етакчи ҳисобланади – бугунги кунда республикада уларнинг сони 14 тага етган.
