Омикрон бўйича илк тадқиқот: янги вариант мавжуд вакциналарни қисман четлаб ўтиши мумкин

Коронавируснинг янги варианти ҳозирда коронавирусга қарши мавжуд вакциналарни қисман четлаб ўтиши мумкин. Шу билан бирга, Жаҳон соғлиқни сақлаш ташкилотида омикрон антитаналар таъминлайдиган ҳимояни дельта вариантига қараганда муваффақиятлироқ енгиши бўйича ҳеч қандай белгилар мавжуд эмаслигини айтишмоқда. У ерда мавжуд вакциналар аввалгидек касаллик оғир кечишидан ҳимоя қилиши кераклигини тасдиқлашяпти.

ЖАР тадқиқотчилари Pfizer/BioNTech вакциналари билан эмланган 12 иштирокчидан 14та плазма намуналарини олишди ва плазманинг омикронни нейтраллаштириш қобилиятини текширишди.

Аниқланишича, омикрон антитаналарни энг кенг тарқалган дельта вариантига қараганда муваффақиятлироқ четлаб ўтган. Умуман олганда, Pfizer/BioNTech вакцинаси омикронга қарши 2019 йилда Хитойда аниқланган коронавирус штаммига қарши 40 марта камроқ нейтраллаштирувчи антитаналар берган.

Бироқ антитаналар сони кескин камайишига қарамай, омикрон вакцина ҳимоясини бутунлай четлаб ўта олмади. Коронавирусни бошдан кечирган кишилар ва вакцинанинг барча дозаларини олган кишиларда эса антитаналарнинг нисбатан юқори даражаси сақланган.

Илк хулосалар

Жанубий Африка тадқиқоти ҳали илмий рецензиядан ўтмади. Бироқ ҳозирнинг ўзидаёқ айрим хулосаларни бериши мумкин.

«Олимлар антитаналарнинг янги вариантни нейтраллаш қобилиятида айрим сусайишни пайқашди. Бироқ омикрон улардан бутунлай қочиб кетолмайди», дея тушунтиради тадқиқотга раҳбарлик қилган Африка соғлиқни сақлаш илмий-тадқиқот институти вирусологи, профессор Алекс Сигал.

«12 кишининг қон таҳлилларига асосланган натижалар мен омикрондан кутган натижаларга қараганда яхшироқ. Мавжуд вакциналар касалликнинг оғир кечиши ва касалхоналарга ётқизиш нуқтайи назаридан ҳозирги вақтга қадар аниқланган мутацияларга қарши ўз самарасини кўрсатди. Ҳозирча омикрон бошқача бўлади, дейиш учун сабаб йўқ», дейди ЖССТ фавқулодда вазиятлар бўлими директори Марк Райан.

Профессор Сигал аввалроқ бошдан кечирилган касаллик билан биргаликда эмланиш янги вариантни нейтраллашга қодир, бу эса бустер дозалар касаллик оғир кечишига қарши яхши ҳимояни таъминлаши мумкинлигини англатади, деб ҳисоблайди.

Pfizer/BioNTech вакцинаси омикрондан қанчалик яхши ҳимоя қилиши борасида қўшимча маълумотлар яқин кунларда пайдо бўлиши кутиляпти. Янги вариантга бошқа вакциналар таъсири борасида тадқиқотлар ҳозирча йўқ.

Аввалроқ Pfizer раҳбари Альберт Бурла тадқиқот бўйича илк маълумотларга асосланиб, Pfizer/BioNTech вакцинасининг учта дозаси омикронга қарши юқори даражадаги ҳимояни таъминлашини маълум қилганди. Шунга қарамай, мавжуд вакцина етарлими ёки янгисини ишлаб чиқишга тўғри келишини тушуниш учун бир неча ҳафта талаб этилади.

Таҳлил: кўпроқ маълумот керак

Мишель Робертс, BBC

Бу кичик тадқиқотдан олинган хулосалар олимлар кутган натижаларга қисман мос келади. Бироқ илк лаборатор натижалар мавжуд вакциналар одамларни қай даражада яхши ҳимоя қилиши борасида ҳали ҳам аниқ жавоб бера олмайди.

Вируснинг ҳужайраларга сингишини тўхтатиш учун унга ёпишадиган нейтраллаштирувчи антитаналар иммун жавобнинг бир қисми саналади, холос.

Вакциналар ёки касалликни бошдан ўтказганлик ҳам бизни вирусдан ҳимояловчи Т ҳужайраларни ишга туширади.

Яқин ҳафталарда олимлар бутун дунёда янги вариантни қанча одам юқтиргани, касалликни қанчалик оғир кечиргани ва вакцина олган ёки олмагани борасида кўпроқ маълумот тўплагач, вазият ойдинлашади.