АҚШнинг Pfizer фармацевтик компанияси раҳбари Альберт Бурла коронавирусга қарши вакцинанинг тўртинчи дозаси билан эмлаш зарурлигини айтди. Бу ҳақда Daily Mail нашри хабар берди.
Бурланинг таъкидлашича, вакцинанинг учта дозаси коронавирусдан жуда яхши ҳимояни таъминлайди, бироқ олимлар бунда одам иммунитети вирусга қарши қанчалик тез кучсизланишини билмайдилар. У “омикрон” штамми пайдо бўлгани ва хавф солаётгани вирус мутация қилишда давом этаётганини ва иккинчи бустер доза ҳал қилувчи бўлиши мумкинлигини айтган.
Бурланинг фикрича, дастлабки тадқиқотлар янги штамм бошқа штаммларга нисбатан камроқ даражада ўлим ҳолатларига олиб келиши мумкинлигини кўрсатаётган бўлса-да, бироқ унинг борлигининг ўзи одамларни огоҳ бўлишга чақиради.
“Фикримча, тўртинчи дозани киритиш керак бўлади. Бунгача мен аввалги штаммлар билан бу дозани учинчи дозадан 12 ой ўтиб киритишга зарурат бўлиши мумкин, деб ўйлардим. “Омикрон” билан эса кутишга тўғри келади, чунки бизда у ҳақида маълумот кам. Биз кўпроқ маълумот олганимиздан кейингина учинчи доза янги штаммга қарши қанчалик самарали экани ва унинг таъсири қанча узоқ сақланиб қолишини билишимиз мумкин”, деб тушунтирган Pfizer раҳбари.
Компания ўтказган тадқиқотлар натижаларига кўра, Pfizer/BioNTech вакцинасининг учта дозаси “омикрон”ни йўқ қилишга қодир. Маълумотларга кўра, вакцинанинг учинчи дозаси киритилгандан кейин вирусни зарарсизлантирувчи антитаначалар миқдори икки доза киритилгандан кейингига нисбатан 25 марта ортади. Шу билан бирга, янги штаммнинг S-оқсилидаги эпитопларнинг 80 фоизи мутация қилмаслиги сабабли вакцинанинг икки дозаси ҳам касалликнинг оғир кечишидан ҳимоялай олади.
